Read Pennsylvania German Psalm 60 Bible Online

Psalm 60 - Pennsylvania German bible

Psalm 60

¹Zumm foah-singah. Fa ksunga sei zumm leet, “Di Lilya Fumm Zeiknis.” En Psalm fumm Dawfit fa en lanning vo eah kfochta hott mitt di Aramayah funn Mesopotamia un funn Zoba, un vo da Joab zrikk kumma is un hott zvelf dausend Edomiddah nunnah kshlauwa. Oh Gott, du hosht uns vekk kshtohsa un fashtroit; du voahsht bays mitt uns, nau du uns viddah drayshta.

²Du hosht's land kshiddeld un's uf kshpalda; nau hayl em land sei rissa, fa's is am funn-nannah shpalda.

³Du hosht dei leit gmacht soffahra, du hosht uns vei gevva zu drinka es uns macht shtaekkahra.

⁴Du hosht selli es dich firchta gvand, so es si vekk kenna fannich em bow. (Sela)

⁵Mitt dei rechtsi hand nemm uns aus di kfoah un heich uns ab, so es selli es du leeb hosht frei gmacht vadda.

⁶Gott hott kshvetzt in sei heilichkeit, “Mitt fraylichkeit zayl ich Sichem fadayla, un zayl's Deich funn Sukkoth ausmessa.

⁷Gilead is mei, un Manasse is mei; Ephraim is mei greeks-hoot, un Juda is mei zeptah.

⁸Moab is mei vesh-shissel; ivvah Edom shmeis ich mei shoo, ivvah Philishtia greish ich laut veil ich di ivvah-hand habb ivvah si.”

⁹Veah zayld mich in di shtatt bringa es feshti vanda hott? Veah zayld mich zu Edom fiahra?

¹⁰Is es nett dich, oh Gott, deah es uns falossa hott, un es nimmi naus gayt mitt unsah greeks-gnechta?

¹¹Gebb uns hilf geyyich unsah feinda, fa di hilf funn mensha is nix veaht.

¹²Mitt Gott zayla miah beeda; eah drett uf unsah feinda.