Read Pennsylvania German Psalm 63 Bible Online

Psalm 63 - Pennsylvania German bible

Psalm 63

¹En Psalm fumm Dawfit vo eah in di vildahnis funn Juda voah. Oh Gott, du bisht mei Gott; ich such dich eahnshtlich. Mei sayl is dashtich fa dich, mei flaysh falangd fa dich vi en drukka un en dah land vo kenn vassah is.

²Ich habb dich ksenna im tempel, un habb dei macht un hallichkeit ksenna.

³Veil dei grohsi leevi bessah is es layva, dann doon mei leftz dich preisa.

⁴Ich zayl dich lohva so lang es ich layb, un in deim nohma hayb ich mei hend uf.

⁵Mei sayl zayld satt sei so vi mitt em besht ess-sach, un mei maul lohbt dich mitt fraylichi leftz.

⁶Vann ich an dich denk uf meim bett, dann bisht du uf mei meind deich di gans nacht.

⁷Du bisht mei helfah, un im shadda funn dei flikkel doon ich fraylich singa.

⁸Mei sayl henkt zu diah, dei rechtsi hand haybt mich uf.

⁹Avvah selli es mei layva nemma vella, zayla nunnah gay in di deef eaht.

¹⁰Si vadda ivvah-gevva zu di graft fumm shvatt, un zayla ess-sach vadda fa di foxa.

¹¹Avvah da kaynich zayld sich froiya in Gott, selli es shveahra bei eem zayla een preisa, avvah di meilah funn leeyah vadda shtill gmacht.