Read Pennsylvania German Psalm 65 Bible Online

Psalm 65 - Pennsylvania German bible

Psalm 65

¹Zumm foah-singah. En Psalm fumm Dawfit. Oh Gott, im shtilla lohbt da mensh dich in Zion, un vass eah diah fashprocha hott vatt gedu.

²Oh du es gebaydah heahsht, awl mensha kumma zu diah.

³Unsah sinda henn uns nunnah gedrikt, avvah du fagebsht unsah ivvah-dreddes.

⁴Ksaykend is sellah es du raus laysht, un nayksht bringsht fa in dei foah-hohfa voona. Miah sinn zufridda mitt di gooda sacha funn deim haus, dei heilichah tempel.

⁵Du gebsht uns andvat deich dei vundahboahri verka in gerechtichkeit, oh du Gott funn unsah saylichkeit, du es di hofning bisht biss an's end funn di eaht, un biss an da veitsht vekk say,

⁶du es di berga gmacht hosht mitt dei graft, un dei grohsi macht gvissa hosht,

⁷du es di yacht fumm say shtill machsht, di yacht funn di vella, un's rawsicha funn di mensha.

⁸Selli es an's end funn di eaht voona fashtauna sich an dei zaycha. Du machsht da meiyet un da ohvet sich froiya.

⁹Du gebsht acht uf di eaht un vessahsht si; du machsht si oahrich fruchtboah. Di revvahra funn Gott sinn foll vassah; du faseiksht di eaht mitt frucht, un so bausht du's land uf.

¹⁰Du vessahsht di blooks-feicha gans haftich, un machsht di roiya ayva. Du machsht's vayyich mitt reyyah un saykendsht's bei's vaxa macha.

¹¹Du krohnsht's yoah mitt dei goodi eahn; datt vo du fabei kfoahra bisht sinn feel goodi sacha.

¹²Di vayt-lendah in di vildahnis sinn gree, un di hivla sinn geglayt mitt frayt.

¹³Di vayt-feldah sinn gedekt mitt shohf, un di feldah im deich mitt frucht. Si greisha naus mitt frayt un singa.