Read Pennsylvania German Psalm 66 Bible Online

Psalm 66 - Pennsylvania German bible

Psalm 66

¹Zumm foah-singah. En Psaltah-Leet. Greishet naus mitt frayt zu Gott, alli lendah.

²Singet di hallichkeit funn seim nohma, gevvet eem hallichah preis.

³Sawwet zu Gott, “Vi vundahboah sinn dei verka! Dei graft is so grohs, es dei feinda sich beeya missa fannich diah.

⁴Di gans eaht bayt dich oh, un singd lohb zu diah, un zu deim nohma.” (Sela)

⁵Kummet un saynet di verka funn Gott, deah vo so vundahboahri sacha dutt fa di mensha-kinnah.

⁶Eah hott da say in drukka land gedrayt; si sinn deich da revvah gloffa mitt iahra fees. Datt froiya miah uns deich een.

⁷Eah roold deich sei macht fa'immah, sei awwa vatsha ivvah di heida-lendah. Loss selli es geyyich een sinn sich nett ufshtella fa ebbah sei. (Sela)

⁸Lohvet unsah Gott, oh diah leit, losset eiyah preis veyyich eem keaht sei.

⁹Eah hott uns levendich kalda, un hott unsah fees kalda funn shlibba.

¹⁰Fa du hosht uns ausbroviaht, oh Gott; du hosht uns greinicht vi silvah.

¹¹Du hosht uns in en fall falla glost; du hosht unsah bikkel nunnah glawda.

¹²Du hosht leit glost ivvah unsah kebb foahra; miah sinn deich's feiyah un deich's vassah ganga. Avvah du hosht uns datt raus kfiaht zu en blatz mit blendi sach.

¹³Fasell zayl ich in dei haus gay mitt brand-opfah, un uf opfahra zu diah vass ich fashprocha habb,

¹⁴sell vass mei leftz ksawt henn un mei maul fashprocha hott vo ich in druvvel voah.

¹⁵Ich zayl diah brand-opfahra bringa funn fett fee, un opfah-shmohk funn shohf-bekk. Ich mach opfahra funn bulla un gays-bekk. (Sela)

¹⁶Kummet un heichet, awl diah es Gott firchtet; losset mich eich sawwa vass eah gedu hott fa mich.

¹⁷Ich habb groofa zu eem mitt mei maul, un ich habb een gepreist mitt mei zung.

¹⁸Vann ich evili gedanka in mei meind katt hett, dann hett da Hah mich nett abkeicht.

¹⁹Avvah Gott hott mich gevislich keaht, un hott acht katt fumm gebayt funn mei shtimm.

²⁰Glohbt sei Gott, eah hott mei gebayt nett nunnah gedrayt, un hott aw sei grohsi leevi nett funn miah kalda.