Read Pennsylvania German Psalm 68 Bible Online

Psalm 68 - Pennsylvania German bible

Psalm 68

¹Zumm foah-singah. En Psaltah-Leet fumm Dawfit. Gott shtayt uf, un sei feinda vadda fashtroit; selli es een hassa fabutza sich fannich eem vekk.

²Vi shmohk vekk geblohsa is, so dreibt eah si vekk; vi wax shmelst im feiyah, so kumma di gottlohsa um fannich Gott.

³Avvah di gerechta froiya sich, un sinn fraylich fannich Gott; si sinn froh un henn grohsi frayt.

⁴Singet zu Gott, singet lohb zu sei nohma; singet en leet zu demm es uf di volka foaht. Sei nohma is HAH; froiyet eich fannich eem.

⁵Gott is en faddah zu selli unni en faddah, un en helfah zu di vitt-veivah, diveil eah in seim heilicha tempel voond.

⁶Gott macht en haymet fa selli es zeidlang henn; eah macht di kfangana frei un helft si goot ab sei. Avvah selli es geyyich Gott shaffa missa in en drukka land layva.

⁷Oh Gott, vo du fannich dei leit heah ganga bisht, vo du deich di vildahnis gloffa bisht, (Sela)

⁸dann hott di eaht kshiddeld, un di himla henn reyyah runnah gleaht, fannich Gott, sellah funn Sinai, fannich Gott, da Gott funn Israel.

⁹Du, oh Gott, hosht gnaydichah reyyah gevvah, du hosht's land funn dei eahbshaft viddah frish gmacht,

¹⁰so es dei drubb leit drinn voona henn kenna. Un deich dei goot-maynichkeit, oh Gott, hosht du acht gevva uf di oahma.

¹¹Da Hah hott's vatt gevva, un selli es es vatt gedrawwa henn voah en grohsi drubb.

¹²Di kaynicha un iahra greeks-gnechta shpringa fatt, un di veibsleit dihaym fadayla's sach es gnumma voah.

¹³Even fa selli funn eich es an di shohf-penna zrikk geblivva sinn, hott's dauva flikkel gedekt mitt silvah, un iahra feddahra mitt sheinich gold.

¹⁴Vo da Awlmechtich di kaynicha ausnannah kshtroit hott, datt uf em Berg Zalmon is shnay kfalla.

¹⁵En Gottes-berg is da berg funn Basan, en berg mitt feel hohchi kebb, is da Berg funn Basan.

¹⁶Favass gukket diah berga es feel shpitza henn, mitt fagunsht, an da berg vo's Gott kfellich is fa voona, datt vo da HAH voona zayld fa'immah?

¹⁷Di greeks-veyya funn Gott sinn feel dausends un dausends; da Hah is funn Sinai kumma un is in sei heilichah blatz ganga.

¹⁸Du bisht nuff in di hay kfoahra, un hosht kfangani mitt dich kfiaht. Du hosht kshenkah grikt funn mensha, even funn selli es geyyich dich shaffa, So es du, Gott da HAH, datt voona kansht.

¹⁹Glohbt sei da Hah, deah vo unsah lasht drawkt alli dawk; eah is da Gott funn unsah saylichkeit. (Sela)

²⁰Unsah Gott is da Gott es uns saylich macht, eah is da Gott, unsah HAH, es uns fumm doht hald.

²¹Avvah Gott zayld di kebb funn sei feinda fabrecha, di hoahricha kebb funn selli es on gayn in iahra sinda.

²²Da Hah hott ksawt, “Ich zayl si viddah zrikk bringa funn Basan, ich bring si zrikk fumm deefa say,

²³so es du dei fees bawda kansht im bloot funn dei feinda, un es di zunga funn dei hund iahra dayl havva kenna.”

²⁴Alli-ebbah saynd dich lawfa vann du gaysht vi en kaynich, oh Gott, si sayna mei Gott un Kaynich in da tempel nei gay.

²⁵Di singah gayn seahsht, un di shpeelah hinna nohch, in di mitt kumma di mayt am di drumma shlauwa.

²⁶Lohvet Gott in di fasamling; preiset da HAH, awl diah leit funn Israel.

²⁷Da Benjamin, da vennichsht funn eena, gayt fanna heah, no kumma di evvahshta funn Juda un iahra drubb, un di evvahshti funn Sebulon un Naphthali.

²⁸Grikk dei macht zammah, oh Gott, veis dei graft, oh Gott, es du gvissa hosht fa uns difoah.

²⁹Deich dei tempel an Jerusalem, zayla kaynicha kshenkah zu diah bringa.

³⁰Zank sell diah is um di shtengel im vassah is, zank di heida, selli drubb bulla mitt iahra kelvah. Drett selli nunnah es am gukka sinn fa silvah; fashtroi selli leit es gleicha greek macha.

³¹Aus Egypta kumma evvahshti es kshikt sinn, Ethiopia zayld kshvind iahra hend naus shtrekka zu Gott.

³²Singet zu Gott, oh kaynich-reicha uf di eaht, singet lohb zumm Hah, (Sela)

³³zu demm es deich di himla foaht, dee himla es datt voahra fumm ohfang. Eah shvetzt mitt en mechtichi shtimm.

³⁴Gevvet Gott di macht! Sei hallichkeit is ivvah Israel, un sei macht is in di volka.

³⁵Unbegreiflich is Gott in seim heilicha tempel; da Gott funn Israel gebt macht un graft zu sei leit. Glohbt sei Gott!