Read Pennsylvania German Psalm 7 Bible Online

Psalm 7 - Pennsylvania German bible

Psalm 7

¹Da Dawfit singd zumm HAH veyyich di vadda fumm Kush da Benjaminiddah. Oh HAH mei Gott, ich du mei fadrauwes in dich fa mich aus di kfoah halda; hald mich funn selli es miah nohch sinn un mach mich frei,

²so es si mich nett fareisa vi en layb, un mich vekk shlayfa vo nimmand is fa helfa.

³Oh HAH mei Gott, vann ich dess gedu habb, vann ungerechtichkeit in mei hend is,

⁴vann ich letz gedu habb zu demm es freindlich is zu miah, adda sellah grawbt habb es mei feind is unni uahsach,

⁵dann loss mei feind miah nohch kumma un mich fanga; loss een mei layva in da grund shtamba, un mei eah im shtawb leiya lossa. (Sela)

⁶Shtay uf, oh HAH, in deim zann; setz dich geyyich da zann funn mei feinda. Vekk uf, mei Gott, un shtell sell recht vass letz is.

⁷Loss di leit sich fasamla um dich rumm, un rool ivvah si funn drovva in di hay.

⁸Da HAH richt di mensha. Richt mich, oh HAH, noch mei gerechtichkeit un unshuld.

⁹Mach di ungerechtichkeit funn di gottlohsa shtobba, avvah mach di gerechta shtandhaftich. Du bisht en gerechtah Gott, un broviahsht di hatza un gedanka.

¹⁰Mei shield ivvah mich is Gott, deah vo di gerechta im hatz helft.

¹¹Gott is en gerechtah richtah, un en Gott es shtrohfa dutt alli dawk.

¹²Vann en mensh nett boos dutt, dann macht eah sei shauf; eah shpand sei bow un zeeld.

¹³Eah hott sich greeks-ksha grisht es doht macht; eah risht sich mitt feiyahrichi arrows.

¹⁴Gukket, da gottlohs hott evil im sinn, eah dutt evil ausshaffa in sei gedanka un bringd falshheit foah.

¹⁵Eah macht en loch un grawbt's aus fa anri, un fald selvaht in's loch es eah gmacht hott.

¹⁶Sei dumhayda kumma zrikk uf sei ayknah kobb, sei unfashtand kumd runnah uf een selvaht.

¹⁷Ich gebb dank zumm HAH fa sei gerechtichkeit, un lohb da Alli-Haychsht HAH bei singa.