Read Pennsylvania German Psalm 72 Bible Online

Psalm 72 - Pennsylvania German bible

Psalm 72

¹En Psalm fumm Solomon. Gebb em kaynich eisicht fa dei gericht ausdrawwa, oh Gott, un dei gerechtichkeit zu em kaynich sei sohn.

²So es eah dei leit richta dutt mitt gerechtichkeit, un feah is zu dei oahmi.

³Loss di berga fridda bringa zu di leit, un di hivla gerechtichkeit.

⁴Eah soll di oahma funn di leit recht yoosa, selli helfa es noht henn, un selli nunnah dredda es anri nunnah dredda.

⁵Eah soll layva so lang es di sunn sheind un so lang es es en moon hott, funn nohch-kummashaft zu nohch-kummashaft.

⁶Loss een sei vi reyyah es uf gmayt graws fald, vi di drobba es es land vessahra.

⁷In sei dawwa loss di gerechta bleeya, un grohsah fridda sei biss da moon nimmi is.

⁸Eah zayld roola funn say zu say, un fumm Euphrates Revvah zu's end funn di eaht.

⁹Di leit in di vildahnis zayla sich nunnah bikka fannich eem, un sei feind zayla da shtawb shlekka.

¹⁰Di kaynicha funn Tharsis un di islands zayla eem kshenkah bringa, un aw di kaynicha funn Sheba un Seba zayla eem kshenkah bringa.

¹¹Awl di kaynicha zayla sich nunnah bikka zu eem, un awl di heida zayla een deena.

¹²Eah macht selli frei es noht henn vann si zu eem roofa, un helft di oahma es kenn hilf henn.

¹³Eah is bamhatzich zu di shvacha un oahma, un helft di sayla funn selli es noht henn.

¹⁴Eah macht iahra layva frei funn gvald un funn nunnah gedrikt sei, un iahra bloot is keshtlich in sei awwa.

¹⁵Loss een lang layva, un loss gold funn Seba zu eem gevva sei. Di leit sella bayda fa een, un een saykna da gans dawk lang.

¹⁶Loss es frucht dikk shtay im land, loss es sich zrikk un faddi beeya drovva uf di hivla. Loss es frucht shteik vaxa vi in Lebanon, un loss di shtett ufkfild sei mitt leit vi's graws im feld.

¹⁷Loss sei nohma sei fa'immah, loss sei nohma shtay so lang es di sunn sheind. Deich een sella awl di heida ksaykend sei, un si zayla een preisa.

¹⁸Ksaykend is Gott da HAH, da Gott funn Israel; yusht eah laynich dutt vundahboahri sacha.

¹⁹Glohbt is sei hallichah nohma fa'immah; loss di gans eaht kfild sei mitt sei hallichkeit. Amen! Amen!

²⁰Dess is es end funn di gebaydah fumm Dawfit, em Jesse sei boo.