Read Pennsylvania German Psalm 73 Bible Online

Psalm 73 - Pennsylvania German bible

Psalm 73

¹En Psalm fumm Asaph. Gott is geviss goot zu Israel, zu selli es rein sinn im hatz.

²Avvah veyyich mich, mei fees sinn yusht shiah goah kshlibt; ich habb shiah kenn foos-hohld may katt.

³Fa ich habb di shtolsa's fagund vo ich ksenna habb es es di gottlohsa so goot gayt.

⁴Si henn kenn kfoah fumm doht, si sinn shteik un ksund.

⁵Si sinn nett in druvvel vi anri leit, un si doon nett soffahra vi anri.

⁶Fasell doon si iahra hohchmoot veahra vi en keshtlichi hals-kett, un iahra unfashtand dekt si zu vi glaydah.

⁷Si sinn so fett es iahra awwa raus shtayn, un si doon yusht vass eena kfald.

⁸Si shpodda un shvetza mitt hass; si sinn grohs-feelich un droiya fa anri letz du.

⁹Si shvetza geyyich Gott im himmel mitt iahra meilah, un gevva shtolsi gebodda zu mennah uf di eaht mitt iahra zunga.

¹⁰Fasell doon leit sich zu eena drayya, un drinka iahra kshvetz ei vi vassah.

¹¹Si sawwa, “Vi kann Gott vissa? Hott da Alli-Haychsht eisicht?”

¹²Gukket, dess sinn di gottlohsa; si henn kenn druvvel in di veld un si vadda reich.

¹³Voah's fa nix es ich mei hatz rein kalda habb, un mei hend gvesha habb in unshuld?

¹⁴Ich voah gmacht leida da gans dawk lang; ich voah kshtrohft alli meiya.

¹⁵Vann ich ksawt hett, “Ich zayl shvetza vi si,” dann hett ich dei leit falaykeld.

¹⁶Vo ich broviaht habb fa dess fashtay, dann voah's zu shveah fa mich,

¹⁷biss ich in's haus funn Gott ganga binn. No habb ich fashtanna vass iahra end sei zayld.

¹⁸Du hosht si geviss in shlibbichi bletz ksetzt, un bringsht si nunnah zu nix.

¹⁹Si vadda bletzlich zu nix gebrocht, si vadda vekk gekeaht zu en heslich end.

²⁰Vi en drohm fagayt vann ebbah uf vekt, so, Hah, vann du uf veksht, dann fa'achtsht du iahra bild.

²¹Vo's miah vay gedu hott im hatz, un ich innahlich kshtocha voah,

²²dann voah ich nett ksheit un habb nix fashtanna. Ich voah vi en unksheit diah fannich diah.

²³Avvah ich bleib immah nayksht bei diah, un du haybsht mich bei mei rechtsi hand.

²⁴Du fiahsht mich mitt deim roht, un shpaydah nemsht mich oh mitt hallichkeit.

²⁵Veah habb ich im himmel unni dich? Un siddah es ich dich habb, hott's nix anres uf di eaht es ich vill.

²⁶Mei leib un mei hatz mechta shvach vadda, avvah Gott is di graft funn meim hatz un mei dayl fa'immah.

²⁷Selli es veit vekk sinn funn diah kumma um, du bringsht selli um es nett shtandhaftich sinn zu diah.

²⁸Avvah fa mich, es is goot fa nayksht zu Gott sei; ich habb mei fadrauwes in Gott da HAH gedu, so es ich alles fazayla kann es du dusht.