Read Pennsylvania German Psalm 74 Bible Online

Psalm 74 - Pennsylvania German bible

Psalm 74

¹En Psalm fumm Asaph. Oh Gott, favass hosht du uns falossa vi dess fa'immah? Favass shmohkt dei zann geyyich di shohf funn dei vayt-feld?

²Fagess dei leit nett es du gekawft hosht lang zrikk; selli es du frei gmacht hosht fa di leit funn dei eahbshaft sei am Berg Zion, datt vo du gvoond hosht.

³Dray dei shritt geyyich demm vass so lang nunnah grissa voah, da feind hott alles fasaut im heilicha tempel.

⁴Dei feinda henn laut gegrisha in di mitt funn dei fasamling-blatz; un henn iahra aykni zaycha datt ufketzt.

⁵Si henn sich ohkshikt vi mennah mitt ex am baym nunnah hakka im bush.

⁶Si henn awl's kshnitzeld hols fabrocha mitt iahra ex un hammahra.

⁷Si henn dei tempel nunnah uf da bodda gebrend, un henn da voon-blatz funn deim Nohma unrein gmacht.

⁸In iahra hatza henn si ksawt, “Vella si gans nunnah drikka.” Si henn awl di fasamling-heisah funn Gott fabrend im land.

⁹Miah sayna unsah zaycha nimmi; es sinn kenn brofayda may do, un nimmand unnich uns vayst vi lang es dess so sei zayld.

¹⁰Vi lang, oh Gott, zayld da feind dich fashpodda? Zayld eah dei nohma faleshtahra fa'immah?

¹¹Favass zeeksht du dei hand zrikk? Nemm dei rechtsi hand aus dei shohs un mach en end funn eena.

¹²Avvah Gott is mei kaynich funn lang zrikk; du bringsht saylichkeit in di mitt funn di eaht.

¹³Du hosht da say kshpalda mitt dei graft, un hosht di kebb fabrocha funn di veeshta diahra im vassah.

¹⁴Du hosht di kebb fabrocha funn di grohs say-shlang, un hosht iahra flaysh zu di diahra in di vildahnis gevva fa ess-sach.

¹⁵Du hosht di shprings un di grikka uf gmacht, un hosht di grohsa revvahra ufgedrikkeld.

¹⁶Da dawk is dei, un so is di nacht; du hosht di sunn un da moon in iahra bletz ksetzt.

¹⁷Du hosht alli dayl uf di eaht gmeikt un abksetzt, un hosht summah un vindah gmacht.

¹⁸So denk droh vi dei feinda dich fashpott henn, oh HAH, un vi di unksheida leit dei nohma faleshtaht henn.

¹⁹Dray nett's layva funn dei daddel-daub ivvah zu vildi diahra, fagess nett's layva funn dei aylendichi leit fa'immah.

²⁰Denk an dei bund, fa di dunkla bletz fumm land sinn foll unfashtendlichi leit.

²¹Loss nett di nunnah-gedreddana in shohm gebrocht sei; loss di oahma un selli es noht henn dei nohma preisa.

²²Shtay uf, oh Gott, un fecht fa dei recht, denk droh vi di gottlohsa dich fashpodda da gans dawk.

²³Fagess nett's gegreish funn dei feinda, un's ufruah es si macha di gans zeit.