Read Pennsylvania German Psalm 76 Bible Online

Psalm 76 - Pennsylvania German bible

Psalm 76

¹Zumm foah-singah: Mitt kshtringdi harfa. En Psalm fumm Asaph, en leet. Gott is bekand in Juda, un in Israel is sei nohma uf kohva.

²Sei tempel-tent is in Salem, un sei voon-blatz is in Zion.

³Datt hott eah di flammichi arrows funn di feinda fabrocha, un aw iahra shields, shvadda un greeks-ksha. (Sela)

⁴Du bisht hallich, un mechtichah es berga mitt diahra.

⁵Di shtaut-hatzicha greeks-gnechta sinn grawbt vadda; si sinn in da shlohf funn di dohda kfalla, un kens funn di greeks-gnechta kann sei hend uf hayva.

⁶Funn deim gezank, oh Gott fumm Jakob, hott da gaul un da vauwa shtill uf em bodda gleyya.

⁷Avvah alli-ebbah soll sich feicha veyyich diah. Veah kann fannich diah shtay vann du bays bisht?

⁸Du hosht dei richtes vissa glost fumm himmel, un di eaht hott sich kfeicht un voah shtill,

⁹vo du, oh Gott, ufkshtanna bisht fa richta fa awl di aylendicha helfa im land. (Sela)

¹⁰Da zann funn mensha gebt diah yusht may eah, un mitt em zann vo ivvahrich is glaytsht du dich.

¹¹Machet fashprechinga zumm HAH eiyah Gott, un haldet si. Awl selli um een rumm sella kshenkah zu eem bringa, un sella sich feicha veyyich eem.

¹²Eah nemd da moot vekk funn di roolahs, un di kaynicha funn di eaht feicha sich veyyich eem.