Read Pennsylvania German Psalm 77 Bible Online

Psalm 77 - Pennsylvania German bible

Psalm 77

¹Zumm foah-singah da Jeduthun. En Psalm fumm Asaph. Ich roof zu Gott mitt mei shtimm fa hilf, zu Gott roof ich, un eah heaht mich.

²Im dawk funn mei druvvel such ich da Hah; in di nacht is mei hand naus kshtrekt un vatt nett meet; mei sayl lost sich nett drayshta.

³Ich denk an Gott, un binn bedreebt, ich denk's ivvah, un mei hatz vatt engshtlich. (Sela)

⁴Du haldsht mich vakkah un haldsht mei awwa uf; ich binn so gedruvveld es ich nett shvetza kann.

⁵Ich denk an di alda dawwa, an di yoahra lang zrikk.

⁶Ich meind noch vi ich als ksunga habb nachts, ich denk an dess im hatz, un mei geisht frohkt,

⁷“Zayld da Hah uns zrikk shtohsa fa'immah? Zayld eah sei gnawt nee nimmi veisa?

⁸Hott sei shtandhaftichi-leevi kshtobt fa'immah? Hott sell vass eah fashprocha hott zu uns kshtobt fa'immah?

⁹Hott Gott fagessa fa bamhatzich sei? Hott sei zann da blatz gnumma funn sei bamhatzichkeit?” (Sela)

¹⁰Un ich sawk, “Dess is vass miah vay dutt— es di rechts hand fumm Alli-Haychshta nimmi greftich is.”

¹¹Avvah ich zayl an di kshefta fumm HAH denka, yau, ich denk an dei vundahra funn lang zrikk.

¹²Ich zayl ivvah awl dei verka denka, un zayl zrikk denka an awl dei kshefta.

¹³Dei vayya, oh Gott, sinn heilich. Vo is en gott es so mechtich is vi unsah Gott?

¹⁴Du bisht da Gott es vundahra dutt; du veisht dei graft unnich di leit.

¹⁵Du hosht dei leit frei-kshteld mitt deim mechticha oahm, di kinnah fumm Jakob un em Joseph. (Sela)

¹⁶Vo di vassahra dich ksenna henn, oh Gott, vo di vassahra dich ksenna henn, henn si sich kfeicht, yau, di deefa vassahra henn kshiddeld.

¹⁷Di volka henn vassah runnah greyyaht, di himla henn gedimmeld, un di gviddah-shtrawla sinn zrikk un faddi ganga.

¹⁸Di yacht funn dimmel voah im himmel, gviddah-shtrawla henn di veld hell gmacht, un di eaht hott geziddaht un kshiddeld.

¹⁹Dei vayk is deich da say ganga, un dei pawt deich di grohsa vassahra, doch dei kshpuah voah nett ksenna.

²⁰Du hosht dei leit kfiaht vi en drubb shohf, mitt di hand fumm Mosi un em Aaron.