Read Pennsylvania German Psalm 78 Bible Online

Psalm 78 - Pennsylvania German bible

Psalm 78

¹En lanning fumm Asaph. Heichet, oh mei leit, zu vass ich eich lann, heichet zu di vadda funn meim maul.

²Ich mach mei maul uf un sawk gleichnisa; ich shvetz veyyich fashtekkeldi sacha funn aldi zeida—

³di sacha es miah keaht un gvist henn, sell vass unsah feddah uns ksawt henn.

⁴Miah fashtekla dess nett funn iahra kinnah, avvah miah fazayla's zu iahra nohch-kummashaft, di hohch gepreisti kshefta fumm HAH, sei macht, un di vundahboahra sacha es eah gedu hott.

⁵Eah hott en zeiknis ausgricht im Jakob, un hott en ksetz gevva in Israel. Eah hott unsah foah-feddah gebodda es si sei ksetz zu iahra kinnah lanna.

⁶Dess is so es iahra nohch-kummashaft si lanna doon, even di kinnah es noch nett geboahra sinn, un es si no iahra kinnah dess sawwa sella.

⁷Dess is so es si iahra hofning in Gott doon, un nett di kshefta funn Gott fagessa, avvah es si sei gebodda halda sella,

⁸un so es si nett sinn vi iahra foah-feddah voahra— en dikk-kebbichi un shteibahrichi nohch-kummashaft, en leit es kenn shtandhaftichi hatza katt henn, un iahra geisht voah aw nett shtandhaftich zu Gott.

⁹Di Ephraimiddah voahra grisht fa greek mitt bows, avvah si sinn zrikk gedrayt vo shtreit kumma is.

¹⁰Si henn Gott sei bund nett kalda, un henn's nett gedu fa lawfa unnich em ksetz.

¹¹Si henn fagessa vass eah gedu katt hott, un sei zaycha es eah eena gvissa katt hott.

¹²Eah hott zaycha gedu fannich iahra foah-feddah, im land Egypta in di feldah funn Zoan.

¹³Eah hott da say fadayld un hott si deich gay glost; eah hott's vassah ufshtay gmacht vi en vand.

¹⁴Eah hott si kfiaht mitt en volk deich da dawk, un gans deich di nacht mitt helling funn feiyah.

¹⁵Eah hott di felsa kshpalda in di vildahnis, un hott eena feel vassah gevva es vi aus em deefa.

¹⁶Eah hott vassah aus em felsa kumma gmacht, un hott's lawfa gmacht vi en revvah.

¹⁷Avvah doch henn si ohkalda sindicha geyyich een, un henn sich geyyich da Alli-Haychsht kshteld in di vildahnis.

¹⁸Si henn Gott fasucht in iahra hatza, bei frohwa fa ess-sach es si falangd henn.

¹⁹Si henn geyyich Gott kshvetzt, un henn ksawt, “Kann Gott en dish rishta in di vildahnis?

²⁰Eah hott da felsa kshlauwa so es vassah raus kumma is, un en grohsah shtrayma vassah is raus gloffa. Avvah kann eah aw broht gevva? Kann eah macha es sei leit flaysh henn?”

²¹Un vo da HAH dess keaht hott, voah eah oahrich bays; feiyah is ausgebrocha geyyich da Jakob, un sei zann is ivvah Israel kumma,

²²veil si nett an Gott geglawbt henn, un iahra hofning nett in sei hilf gedu henn.

²³Avvah doch hott eah en gebott gevva drovva zu di volka, un eah hott di deahra fumm himmel uf gmacht.

²⁴Eah hott manna runnah greyyaht uf si fa essa, un hott eena ess-sach gevva fumm himmel.

²⁵Si henn's broht funn engel gessa; eah hott eena awl's ess-sach kshikt es si essa henn kenna.

²⁶Eah hott da east vind gmacht blohsa fumm himmel, un deich sei macht hott eah da saut vind kfiaht.

²⁷Eah hott flaysh uf si reyyahra gmacht vi shtawb, un fekkel vi da sand am say.

²⁸Si sinn in di mitt funn iahra camp kfalla, un gans um iahra tents rumm.

²⁹Si henn gessa biss si satt voahra; eah hott eena iahra falanga gevva.

³⁰Avvah even eb si gans satt voahra, diveil es noch ess-sach in iahra meilah voah,

³¹is da zann funn Gott uf si kumma, un hott di shteikshta funn eena doht gmacht, di beshta yungi mennah funn Israel.

³²Avvah mitt awl demm, henn si alsnoch ohkalda sindicha, un henn nett an sei vundahboahri kshefta geglawbt.

³³So hott eah iahra dawwa gmacht fagay vi en ohften, un si henn iahra yoahra ausglaybt mitt furcht.

³⁴Vann eah da doht unnich si gebrocht hott, henn si Gott ksucht un henn sich zu eem gedrayt.

³⁵Si henn gmeind es Gott iahra Felsa is, es da Alli-Haychsht Gott iahra Frei-Shtellah is.

³⁶Avvah si henn een ohkfiaht mitt iahra meilah; si henn glowwa zu eem mitt iahra zunga.

³⁷Iahra hatza voahra nett shtandhaftich zu eem, si henn sei bund nett ufrichtich kalda.

³⁸Avvah eah voah bamhatzich zu eena, un hott iahra sinda fagevva. Eah hott si nett umgebrocht. Eah hott sei zann oft zrikk kohva, un hott sei baysi gedanka nett auskfiaht.

³⁹Eah hott gmeind es si yusht flaysh voahra, en vind es fabei blohst un kumd nett viddah zrikk.

⁴⁰Vi oft henn si geyyich een kshaft in di vildahnis, un henn een bedreebt gmacht draus im veeshta land!

⁴¹Ivvah un ivvah henn si Gott ausbroviaht, un henn da Heilich Gott funn Israel fa'eiyaht.

⁴²Si henn fagessa veyyich sei graft, un da dawk es eah si frei gmacht hott funn iahra feinda,

⁴³vi eah sei zaycha gedu hott in Egypta, un grohsi vundahra gedu hott in Zoan.

⁴⁴Eah hott di revvahra zu bloot gedrayt, un si henn's vassah nett drinka kenna in di grikka.

⁴⁵Eah hott mukka kshikt, so es si oahrich deich gmacht henn, un fresh es si gmacht henn feel ausleida.

⁴⁶Eah hott iahra crops zu di hoi-shrekka gevva, un di frucht funn iahra eahvet zu di locusts.

⁴⁷Eah hott iahra vei-shtekk fadauva mitt shlohsa, un iahra feiya-baym mitt frosht.

⁴⁸Eah hott iahra kee kshlauwa mitt shlohsa un iahra fee mitt gviddah-shtrawla.

⁴⁹Eah hott sei gleedichah zann lohs gedrayt uf si. Mitt rawses, baysi gedanka un bedreebnis hott eah baysi engel kshikt es da doht gedrawwa henn.

⁵⁰Eah hott sei zann lohs gay glost, un hott iahra sayla nett kalda fumm doht, avvah hott iahra layva ivvah-gevva zu en heslichi granket.

⁵¹Eah hott di eahsht-geboahrana funn Egypta nunnah kshlauwa, di eahsht-frucht funn di mensha in di tents fumm Ham.

⁵²Avvah eah hott sei aykni leit raus kfiaht vi shohf, un is eena foah-ganga in di vildahnis.

⁵³Eah hott si aus di kfoah raus kfiaht, un si henn sich nett kfeicht, avvah da say hott iahra feinda zu gedekt.

⁵⁴So hott eah si zu sei heilich land gebrocht, zumm hivvel-land es sei rechtsi hand gnumma katt hott.

⁵⁵Eah hott's folk in di lendah raus gedrivva fannich eena, un hott di lendah fadayld zu eena fa en eahbshaft; eah hott di shtamma funn Israel in iahra haymeda voona glost.

⁵⁶Doch henn si Gott fasucht, un henn geyyich da Alli-Haychsht kshaft; si henn sei gebodda nett kalda.

⁵⁷Avvah si henn zrikk gedrayt un voahra nett shtandhaftich, grawt vi iahra foah-feddah nett voahra. Si henn so vennich gedraut sei kenna es en shlechtah bow.

⁵⁸Si henn een fa'eiyaht mitt iahra hohchi opfah-bletz, un henn een jealous gmacht mitt iahra abgettah.

⁵⁹Vo Gott si keaht hott, voah eah oahrich bays, eah hott Israel nimmi ohgnumma.

⁶⁰Eah hott sei voon-blatz an Shiloh falossa, da tent es eah drinn gvoond hott unnich di mensha.

⁶¹Eah hott di Bundes-Lawt funn sei macht glost kfanga vadda, un hott sei hallichkeit glost in di hend funn di feinda gay.

⁶²Eah hott sei leit ivvah-gevva zumm shvatt, un hott sei zann ausnemma glost uf sei eahbshaft.

⁶³Es feiyah funn greek hott iahra yungi mennah kfressa, un di yungi mayt henn nimmand katt fa heiyahra.

⁶⁴Iahra preeshtah sinn umkumma bei em shvatt, un iahra vitt-veivah henn nett heila kenna.

⁶⁵No is da Hah uf gvekt es vi aynah funn seim shlohf, vi en shteikah mann eifahrich vatt funn vei.

⁶⁶Eah hott sei feinda hinnahsich gedrivva, un hott si sich ayvichlich shemma gmacht.

⁶⁷Eah hott da tent fumm Joseph nunnah gedrayt, un hott aw da shtamm fumm Ephraim nett raus glaysa.

⁶⁸Avvah eah hott da shtamm fumm Juda ohgnumma, da Berg Zion, es eah leeb hott.

⁶⁹Eah hott sei tempel hohch gebaut vi di himla, vi di eaht es eah kshaffa hott fa'immah.

⁷⁰Eah hott sei gnecht da Dawfit raus glaysa, un hott een funn di shohf-penna gnumma;

⁷¹funn shohf heeda mitt shiblen hott eah een raus gebrocht, fa sei folk Jakob heeda, di Kinnah-Israel, sei eahbshaft.

⁷²So mitt en ufrichtich hatz hott eah si keet, un hott si kfiaht mitt begawbdi hend.