Read Pennsylvania German Psalm 79 Bible Online

Psalm 79 - Pennsylvania German bible

Psalm 79

¹En Psalm fumm Asaph. Oh Gott, di heida sinn rei kumma fa dei eahbshaft ivvah-nemma; si henn dei heilichah tempel unrein gmacht, un henn Jerusalem en shtay haufa gmacht.

²Si henn di dohda leivah funn dei gnechta zu di fekkel fumm himmel gevva fa ess-sach, un's flaysh funn dei heilichi zu di diahra fumm land gevva.

³Si henn iahra bloot ausgleaht vi vassah um Jerusalem rumm, un's voah nimmand datt fa si fagrawva.

⁴Miah sinn en shpott gmacht zu unsah nochbahra; selli um uns rumm shpodda un lacha ivvah uns.

⁵Vi lang, oh HAH? Zaylsht du bays sei fa'immah? Zayld dei zann ohhalda brenna vi feiyah?

⁶Dray dei zann uf di heida, uf selli es dich nett kenna, selli kaynich-reicha es dei nohma nett ohroofa.

⁷Si henn em Jakob sei nohch-kummashaft ufkfressa, un sei haym-land fasaut.

⁸Hayb di sinda funn unsah foah-feddah nett geyyich uns; loss dei bamhatzichkeit kshvind uf uns kumma, fa miah henn en grohsi noht.

⁹Helf uns, oh du Gott funn unsah saylichkeit, fa di hallichkeit funn deim nohma. Mach uns frei, un fagebb unsah sinda, fa da sayk funn deim nohma.

¹⁰Favass sedda di heida sawwa, “Vo is iahra Gott?” Fannich unsah awwa, loss es gvissa vadda unnich di heida, es du zrikk betzawlsht fa's fagossa bloot funn dei gnechta.

¹¹Loss es geyammah funn di kfangana fannich dich kumma, un bei dei grohsi macht hald selli levendich es kshteld sinn fa doht gmacht vadda.

¹²Betzawl zrikk in di shohsa funn unsah nochbahra sivva mohl so feel shohm es si dich fashohmd henn mitt, oh Hah.

¹³No doon miah, dei leit un di shohf funn dei vayt, dich ayvichlich danka, un miah preisa dich fa'immah un immah.