Read Pennsylvania German Psalm 80 Bible Online

Psalm 80 - Pennsylvania German bible

Psalm 80

¹Zumm foah-singah. En Psalm un zeiknis fumm Asaph. Fa ksunga sei zu di veis fumm “Lilya Leet”. Heich uns ab, oh Heedah funn Israel; du fiahsht da Joseph vi en drubb shohf. Du, es uf em kaynich-shtool hoksht zvishich di cherubim, shein naus,

²fannich em Ephraim, em Benjamin un em Manasse. Shtah dei macht uf, un kumm un helf uns.

³Mach uns vass miah als voahra, oh Gott, un loss es licht funn dei ksicht uf uns sheina, so es miah kolfa sei kenna.

⁴Oh HAH, Almechtichah Gott, vi lang zaylsht du zannich sei mitt di gebaydah funn dei leit?

⁵Du hosht si kfeedaht mitt's broht funn awwa-vassah, un si gedrenkt mitt awwa-vassah bei di bowlfoll.

⁶Du losht unsah nochbahra fechta ivvah unsah land, un unsah feinda lacha unnich sich selvaht.

⁷Mach uns vass miah voahra, oh Almechtichah Gott, un loss es licht funn dei ksicht uf uns sheina, so es miah kolfa sei kenna.

⁸Du hosht en vei-shtokk aus Egypta gebrocht; du hosht di heida ausgedrivva un een geblanst.

⁹Du hosht's land grisht fa da vei-shtokk, un eah hott vatzla grikt un's land kfild.

¹⁰Di hivla voahra zu gedekt mitt sei shadda, un di mechticha cedar-baym mitt sei nesht.

¹¹Sei nesht henn naus glangd biss an da say, un sei ranka biss an da Revvah.

¹²Favass hosht du sei vanda nunnah gebrocha, so es ennich ebbah es fabei gayt di drauva nemma kann?

¹³Di vilda sei fumm bush sauwa si nunnah, un di diahra funn di feldah fressa si.

¹⁴Kumm zrikk, oh Awlmechtichah Gott! Gukk runnah fumm himmel un sayn dess. Gebb acht uf deah vei-shtokk,

¹⁵da shtokk es dei rechtsi hand geblanst hott, da nasht es du shteik gmacht hosht fa dich selvaht.

¹⁶Si henn dei vei-shtokk nunnah kakt, un en fabrend mitt feiyah; bring si um vann du si ohguksht.

¹⁷Layk dei hand uf da mann an dei rechtsi seit, da sohn fumm mensh es du so shteik gmacht hosht;

¹⁸no drayya miah nee nimmi vekk funn diah. Loss uns layva, no doon miah dei nohma ohroofa.

¹⁹Mach uns vass miah voahra, oh HAH, Almechtichah Gott; loss es licht funn dei ksicht uf uns sheina, so es miah kolfa sei kenna.