Read Pennsylvania German Psalm 81 Bible Online

Psalm 81 - Pennsylvania German bible

Psalm 81

¹Zumm foah-singah. Fumm Asaph. Singet mitt frayt zu Gott, unsah graft; greishet fraylich zumm Gott fumm Jakob.

²Fanget oh psaltah singa, shlauwet di drumma, un shpeelet di grohsa un glenna harfa.

³Blohset's blohs-hann an di zeit fumm Neiya-Moon un an di zeit fumm folla moon, uf unsah fesht-dawk.

⁴Dess is en ksetz fa Israel, en adning fumm Jakob sei Gott.

⁵Eah hott's gmacht es en zeiknis fa da Joseph vo eah naus ivvah's land Egypta ganga is. Ich habb en shprohch keaht es ich nett fashtanna habb,

⁶es ksawt hott, “Ich habb da lasht ab funn eiyah shuldra gnumma, un eiyah hend frei gmacht funn di shveahra keahb.

⁷Diah hend mich ohgroofa in eiyah noht, un ich habb eich kolfa, ich habb eich andvat gevva aus di gviddah-volk, un habb eich ausbroviaht am vassah funn Meribah. (Sela)

⁸Heichet, oh mei leit, zu mei vanning— vann diah yusht heicha daydet zu miah, oh Israel!

⁹Diah sellet kenn anrah gott unnich eich havva, un sellet kenn fremdah gott ohbayda.

¹⁰Ich binn da HAH eiyah Gott, deah vo eich ruff aus Egypta gebrocht hott. Machet eiyah meilah grohs uf, un ich fill si.

¹¹Avvah mei leit henn mei shtimm nett abkeicht, Israel vill nix vissa funn miah.

¹²So habb ich si ivvah-gevva zu iahra dikk-kebbichi hatza, un si glost iahra ayknah roht nohch gay.

¹³Vann mei leit yusht heicha dayda zu miah! Vann Israel mei vayk nohch gay dayt,

¹⁴dann dayt ich kshvind iahra feinda unnich si du, un mei hand geyyich selli drayya es geyyich si sinn.

¹⁵Selli es da HAH hassa, mista sich beeya fannich eem, un iahra shtrohf veah ayvichlich.

¹⁶Avvah ich dayt eich feedra mitt em beshta vaytza; ich dayt eich satt macha mitt hunnich aus em felsa.”