Read Pennsylvania German Psalm 83 Bible Online

Psalm 83 - Pennsylvania German bible

Psalm 83

¹En Psaltah-Leet fumm Asaph. Oh Gott, hald nett oh ruich sei; bleib nett shtill un ruich, oh Gott.

²Gukk moll, dei feinda macha en ufruah, un selli es dich hassa hayva iahra kebb uf.

³Si henn shlichtichi sacha im sinn geyyich dei leit, si shkeema geyyich dei keshtlichi.

⁴Si sawwa, “Kummet, vella si ausreiva es en folk, so es da nohma funn Israel gans fagessa vatt.”

⁵Si shaffa zammah geyyich dich mitt ay meind, un macha en bund geyyich dich—

⁶di tents funn Edom un Ismael, un funn Moab un di Hagariddah,

⁷selli funn Gebal, Ammon un Amalek, di Philishtah, mitt selli funn Tyrus.

⁸Un Assur is aw zammah ganga mitt eena, fa em Lot sei nohch-kummashaft shteik macha. (Sela)

⁹Du zu eena vass du hosht mitt Midian, vass du gedu hosht mitt em Sisera un em Jabin am Kison Revvah.

¹⁰Si voahra umgebrocht an Endor, un sinn vadda vi misht uf em grund.

¹¹Du zu iahra foah-gengah vass du hosht zumm Oreb un em Seeb, un zu iahra roolahs vi da Sebah un da Zalmuna,

¹²es ksawt henn, “Miah nemma fa uns selvaht, es land es zu Gott heaht.”

¹³Mei Gott, mach si vi en shtawvichah vind-veahvel, vi shprau fannich em vind.

¹⁴Vi feiyah da bush fabrend, un vi flamm di hivla ohshtekt,

¹⁵so gay eena nohch mitt dei shtoahm, un fagelshtah si mitt shteikah vind.

¹⁶Dekk iahra ksichtah zu mitt shohm, so es si dei nohma bekenna missa, oh HAH.

¹⁷Loss si sich ayvichlich shemma un angsht havva; loss si umkumma in shohm.

¹⁸Loss si vissa es du laynich sellah bisht vo da nohma HAH hott— du laynich bisht da Alli-Haychsht ivvah di gans veld.