Read Pennsylvania German Psalm 84 Bible Online

Psalm 84 - Pennsylvania German bible

Psalm 84

¹Zumm foah-singah. En Psalm funn di kinnah funn Korah. Noch em Gittith. Vi leeblich is dei voon-blatz, oh Awlmechtichah HAH.

²Mei sayl hott en falanga un en oahrichah vinsh fa im hohf fumm HAH sei haus sei. Mei hatz un leib froiya sich im levendicha Gott.

³Even di shpatz hott en haymet kfunna, un di shvalma en nesht fa iahra yungi, en blatz nayksht an deim awldah, oh Almechtichah HAH, mei Kaynich un mei Gott.

⁴Ksaykend sinn selli es in deim haus voona; si sinn immah am dich lohva. (Sela)

⁵Ksaykend sinn di mensha es iahra graft greeya funn diah, un es iahra hatz ksetzt henn fa zu diah kumma.

⁶Vi si deich's Deich funn Baca gayn, dann macha si's en blatz funn vassah-shprings, di freeya reyya henn's gedekt mitt vassah-lechah.

⁷Si gayn funn graft zu may graft, biss alli-ebbah fannich Gott kumd in Zion.

⁸Heich mei gebayt ab, oh HAH, Almechtichah Gott, heich mitt deim oah, oh Gott fumm Jakob. (Sela)

⁹Gukk an unsah shield, oh Gott, un gukk uf's ksicht funn deim ksalbdah.

¹⁰'Sis bessah fa ay dawk im hohf funn deim haus sei, es en dausend eiyets shunsht. Ich vett leevah en deah-heedah sei in mei Gott sei haus, es vi in di tents funn di gottlohsa voona.

¹¹Fa Gott da HAH is en sunn un en shield; da HAH gebt gnawt un hallichkeit. Eah haybt nix goodes zrikk funn selli es ufrichtich lawfa.

¹²Oh Almechtichah HAH, ksaykend is da mann es sich falost uf dich.