Read Pennsylvania German Psalm 85 Bible Online

Psalm 85 - Pennsylvania German bible

Psalm 85

¹Zumm foah-singah. En Psalm funn di kinnah funn Korah. Du voahsht gnaydich zu deim land, oh HAH, un hosht dei kfangani fumm Jakob zrikk gebrocht.

²Du hosht di shulda funn dei leit fagevva, un hosht awl iahra sinda zu gedekt. (Sela)

³Du hosht ufkeaht bays sei mitt eena, un bisht vekk gedrayt funn dei gleedichah zann.

⁴Bring uns zrikk, oh Gott, unsah Heiland, un du dei zann vekk geyyich uns.

⁵Zaylsht du bays sei ivvah uns fa'immah? Zayld dei zann nee nett ufheahra?

⁶Zaylsht du uns nett viddah greftich macha, so es dei leit sich froiya kenna ivvah dich?

⁷Veis uns dei shtandhaftichi-leevi, oh HAH, un gebb uns dei saylichkeit.

⁸Ich zayl heicha vass Gott da HAH sawwa zayld; eah fashprecht fridda zu sei leit, sei saylichi, avvah si sella nett viddah zrikk gay zu iahra dumhayda.

⁹Sei saylichkeit is geviss nayksht zu selli es een firchta, so es sei hallichkeit in unsah land bleibt.

¹⁰Leevi un voahheit kumma zammah; gerechtichkeit un fridda kissa nannah.

¹¹Voahheit kumd ruff aus di eaht; gerechtichkeit gukt runnah fumm himmel.

¹²Da HAH gebt geviss sell vass goot is, un unsah land gebt iahra frucht.

¹³Gerechtichkeit gayt fannich eem heah, un risht da vayk fa sei shritt.