Read Pennsylvania German Psalm 86 Bible Online

Psalm 86 - Pennsylvania German bible

Psalm 86

¹En gebayt fumm Dawfit. Heich mich ab, oh HAH, un gebb miah andvat, fa ich binn oahm un in noht.

²Heet mei sayl, fa ich gebb mich zu diah; helf deim gnecht, oh mei Gott, fa ich faloss mich uf dich.

³Sei gnaydich zu miah oh HAH, fa ich roof zu diah da gans dawk lang.

⁴Mach di sayl funn deim gnecht froh, fa zu diah, oh Hah, doon ich bayda.

⁵Du, oh Hah, bisht goot un immah grisht fa fagevva mitt shtandhaftichi-leevi zu selli es dich ohroofa.

⁶Heich mei gebayt ab, oh HAH; heich mei shtimm ab vi ich dich ohbitt.

⁷Im dawk funn meim druvvel zayl ich dich ohroofa, fa du gebsht miah andvat.

⁸Unnich di gettah hott's nimmand vi dich, oh Hah, un's hott kenn verka vi deini.

⁹Awl di heida es du gmacht hosht zayla kumma un dich ohbayda, oh HAH, un zayla dei nohma fagleahra.

¹⁰Du bisht grohs un dusht vundahboahri verka; du laynich bisht Gott.

¹¹Lann mich dei vayk, oh HAH, so es ich in dei voahheit lawfa kann. Mach mei hatz aynich, so es ich dei nohma firchta du.

¹²Ich gebb dank zu diah, oh Hah, mei Gott, mitt mei gans hatz, un gebb eah zu deim nohma fa'immah.

¹³Dei shtandhaftichi-leevi geyyich miah is grohs, un du hosht mei sayl aus em deefa grawb kalda.

¹⁴Oh Gott, shtolsi leit henn sich ufketzt geyyich mich; en drubb unfashtendlichi mennah vella mei layva nemma, un si gevva nix um dich.

¹⁵Avvah du, oh Hah, bisht en bamhatzichah un en gnaydichah Gott, un bisht geduldich mitt feel leevi un shtandhaftichkeit.

¹⁶Dray dich zu miah un sei bamhatzich zu miah; gebb dei graft zu deim gnecht, un helf demm sohn funn dei mawt.

¹⁷Veis miah en zaycha es du's goot maynsht fa mich, so es selli es mich hassa sich shemma missa, veil du, oh HAH, miah bei shtaysht un mich drayshta dusht.