Read Pennsylvania German Psalm 88 Bible Online

Psalm 88 - Pennsylvania German bible

Psalm 88

¹En Psaltah-Leet funn di kinnah fumm Korah. Zumm foah-singah. En lanning fumm Heman, da Ezrahiddah. Oh HAH Gott, mei Heiland, ich roof zu diah fa hilf dawk un nacht.

²Loss mei gebayt fannich dich kumma, dray dei oah zu miah vann ich roof.

³Mei sayl is foll druvvel, un mei layva is nayksht am doht.

⁴Ich binn fanumma es vi selli es nunnah in's grawb gayn; ich binn vi en mann es kenn grefta hott.

⁵Ich binn falossa unnich di dohda, vi selli es umgebrocht sinn un im grawb leiya, selli es du fagessa hosht, un abkshnidda sinn funn dei hilf.

⁶Du hosht mich in's deef grawb gedu, in en dunkel un en deef loch.

⁷Dei zann leit shveah uf miah, du driksht mich nunnah mitt dei vella. (Sela)

⁸Du hosht awl mei freind gmacht mich falossa; du hosht mich grausam gmacht zu eena; ich binn kfanga un kann nett vekk.

⁹Mei awk vatt dunkel deich dreebsawl; ich roof zu diah alli dawk, oh HAH; ich hayb mei hend naus zu diah.

¹⁰Zaylsht du vundahra du fa di dohda? Zayla di dohda uf shtay un dich danka? (Sela)

¹¹Is dei shtandhaftichi-leevi vissa gmacht im grawb, adda dei shtandhaftichkeit im land funn fadeahves?

¹²Sinn dei vundahra vissa gmacht im dunkla, adda dei gerechtichkeit im land funn di fagessana?

¹³Avvah ich roof naus zu diah fa hilf, oh HAH, un mei gebayt kumd free meiyets zu diah.

¹⁴Favass draysht du mich nunnah, oh HAH? Favass fashtekkelsht du dei ksicht funn miah?

¹⁵Funn yungem uf habb ich dreebsawl glidda un voah nayksht am doht; ich habb dei shtrohf glidda un ich kann miah nimmi helfa.

¹⁶Dei gleedichah zann is ivvah mich kumma; da shreklich angsht funn diah drikt mich nunnah.

¹⁷Si sinn um mich rumm vi vassah da gans dawk, si kumma rei ivvah mich funn alli seit.

¹⁸Awl mei freind un naykshti hosht du gmacht mich falossa, un's is dunkel vo-evvah es ich binn.