Read Pennsylvania German Psalm 89 Bible Online

Psalm 89 - Pennsylvania German bible

Psalm 89

¹En lanning fumm Ethan, da Ezrahiddah. Ich zayl singa veyyich di shtandhaftich leevi fumm HAH fa'immah; un zayl sei shtandhaftichkeit fakindicha mitt meim maul ayvichlich.

²Ich habb ksawt, “Dei shtandhaftichi-leevi shtayt fa'immah un dei shtandhaftichkeit is so fesht es da himmel selvaht.”

³Du hosht ksawt, “Ich habb en bund gmacht mitt sellah es ich raus groofa habb; ich habb kshvoahra zu meim gnecht da Dawfit,

⁴‘Ich zayl dei sohma ufsetza fa'immah, un dei kaynich-shtool ufbauwa ayvichlich.’” (Sela)

⁵Di himla preisa dei vundahra, oh HAH, un dei shtandhaftichkeit in di fasamling funn di heilicha.

⁶Fa veah in di himla is gleich vi da HAH? Veah unnich di kinnah funn di mechticha is vi da HAH?

⁷Gott is kfircht in di fasamling funn di heilicha, un vundahboah hohch ufkohva ovvich selli um een rumm.

⁸Oh HAH, Almechtichah Gott, veah is vi du? Du bisht mechtich, oh HAH, un dei shtandhaftichkeit is um dich rumm.

⁹Du roolsht ivvah da ungeduldich say; vann di vella uf kumma, dusht du si shtill macha.

¹⁰Du hosht's diah Rahab fadrikt un doht gmacht, un dei feinda ausnannah kshtroit mitt dei shteikah oahm.

¹¹Da himmel un di eaht sinn dei; du hosht di veld gmacht un alles es drinn is.

¹²Di natt un di saut hosht du kshaffa, di Berga Thabor un Hermon singa ivvah dei nohma.

¹³Du hosht en shteikah oahm; dei hand is mechtich, dei rechtsi hand is hohch uf kohva.

¹⁴Gerechtichkeit un gericht hayva dei kaynich-shtool uf, shtandhaftichi-leevi un voahheit gayn fannich diah heah.

¹⁵Ksaykend sind di leit es singa kenna zu diah, si lawfa in di helling funn deim ksicht, oh HAH.

¹⁶Si sinn fraylich ivvah dei nohma alli dawk, un hayva dei gerechtichkeit hohch uf.

¹⁷Fa du bisht iahra hallichkeit un graft, un deich dei gnawt haybsht du unsah hann uf.

¹⁸Unsah shield heaht zumm HAH, un unsah kaynich zumm Heilicha Gott in Israel.

¹⁹Aymol hosht du kshvetzt in en vision zu dei gettlichi, un hosht ksawt, “Ich habb hilf gevva zu aym es mechtich is. Ich habb aynah uf kohva aus di leit.

²⁰Ich habb da Dawfit mei gnecht kfunna; mitt mei heilich ayl habb ich een ksalbt.

²¹Mei hand zayld een uf hayva, un mei oahm zayld een shteik macha.

²²Kenn feinda zayla een nunnah dredda, un di gottlohsa zayla een nett ivvah-kumma.

²³Ich famawl selli fannich eem es geyyich een shaffa, un shlakk selli nunnah es een hassa.

²⁴Mei shtandhaftichi-leevi un bamhatzichkeit zayld bei eem sei, un deich mei nohma zayld sei greftich hann uf kohva sei.

²⁵Ich zayl sei hand ivvah da say setza, un sei rechtsi hand ivvah di revvahra.

²⁶Eah zayld sawwa zu miah, ‘Du bisht mei Faddah, mei Gott un da Felsa funn mei saylichkeit’.

²⁷Un ich zayl een da eahsht-geboahra sohn macha, da haychsht funn di kaynicha uf di eaht.

²⁸Mei shtandhaftichi-leevi hald ich immah fa een, un mei bund zayld fesht shtay fa een.

²⁹Ich zayl sei nohch-kummashaft ufsetza fa'immah, un sei kaynich-shtool so lang es da himmel shtayt.

³⁰Avvah vann sei kinnah mei Ksetz falossa, un lawfa mei gebodda nett nohch,

³¹vann si mei adnunga brecha, un doon mei gebodda nett halda,

³²dann shtrohf ich iahra sinda mitt em shtekka, un iahra ungerechtichkeit mitt shlayk.

³³Avvah ich nemm mei shtandhaftichi-leevi nett funn eem, un loss mei shtandhaftichkeit nee nett shtobba.

³⁴Ich brech mei bund nett mitt eem, un fa'ennah nett di vadda es mei leftz ksawt henn.

³⁵Ich habb aymol kshvoahra bei mei heilichkeit, un zayl nett leeya zumm Dawfit.

³⁶Sei nohch-kummashaft zayld sei fa'immah, un sei kaynich-reich so lang es di sunn fannich miah shtayt.

³⁷Es soll shtay fa'immah vi da moon, sellah shtandhaftich zaycha im himmel.” (Sela)

³⁸Avvah du, Hah, hosht een nunnah gedrayt un vekk kshtohsa; du bisht bays mitt deim ksalbda kaynich.

³⁹Du hosht dei bund gebrocha mitt deim gnecht; du hosht sei krohn nunnah in da shtawb kshmissa.

⁴⁰Du hosht awl sei mavvahra nunnah grissa, un hosht sei shteiki-bletz alles fabrocha.

⁴¹Awl selli es fabei gayn shtayla funn eem, sei nochbahra shpodda ivvah een.

⁴²Du hosht di rechts hand funn sei feinda uf kohva, si doon sich awl froiya.

⁴³Du hosht aw di graft funn sei shvatt vekk gnumma; du hosht een nett uf kohva im greek.

⁴⁴Du hosht sei glitz vekk gnumma funn eem, un hosht sei kaynich-shtool uf da bodda kshmissa.

⁴⁵Du hosht een ald gmacht eb sei zeit, un hosht een zu gedekt mitt shohm. (Sela)

⁴⁶Vi lang, oh HAH? Zaylsht du dich fashtekla fa'immah? Vi lang zayld dei zann brenna vi feiyah?

⁴⁷Denk droh vi katz es mei layva is, du hosht awl mensha kshaffa fa nix.

⁴⁸Vass fa en mensh kann layva un nett shtauva? Kann eah sei sayl aus di graft fumm grawb halda? (Sela)

⁴⁹Oh Hah, vo is dei shtandhaftichi-leevi funn lang zrikk, selli es du shtandhaftich kshvoahra hosht zumm Dawfit?

⁵⁰Denk droh, oh Hah, vi dei gnecht fashpott is, vi ich deah shpott funn awl di leit drawk in meim hatz.

⁵¹Deah shpott es dei feinda macha, oh HAH; si fashpodda dei ksalbdah kaynich vo-evvah es eah anna gayt.

⁵²Glohbt sei da HAH fa'immah! Amen! Amen!