Read Pennsylvania German Psalm 9 Bible Online

Psalm 9 - Pennsylvania German bible

Psalm 9

¹En Psalm fumm Dawfit. Zumm foah-singah. Ich zayl da HAH danka mitt mei gans hatz; un zayl fazayla veyyich awl dei vundahra.

²Ich zayl mich froiya un fraylich sei in diah. Ich zayl lohb singa zu dei nohma, du Alli-Haychshtah.

³Mei feinda sinn zrikk gedrayt vadda, si shtolbahra un kumma um fannich diah.

⁴Du hosht miah kolfa mei recht greeya un hosht ufkshtanna fa mei sacha. Du hosht uf em richtah-shtool kokt un gricht vass recht voah.

⁵Du hosht di heida gezankt un di gottlohsa umgebrocht; du hosht iahra nohma ausgrivva fa'immah.

⁶Di feinda sinn faddich fa'immah, du hosht iahra shtett zammah grissa, si sinn gans fagessa.

⁷Avvah da HAH hokt uf em kaynich-shtool fa'immah, eah richt funn seim richtah-shtool.

⁸Eah zayld di veld richta in gerechtichkeit, un zayld di leit roola mitt en recht gericht.

⁹Da HAH is en sayfah Roo-Blatz fa di nunnah-gedreddana, en sayfah blatz an di zeit funn druvvel.

¹⁰Selli es dei nohma vissa doon iahra fadrauwa in dich; fa du, oh HAH, falosht selli nett es dich sucha.

¹¹Lohvet da HAH es in Zion voond, sawwet di leit vass eah gedu hott.

¹²Fa deah vo ayva kumd mitt di bloot-fageesah, fagest nett; eah fa'acht nett selli es leida un naus roofa.

¹³Sei bamhatzich zu miah, oh HAH, gukk moll vi ich leida muss deich selli es mich hassa. Hayb mich uf funn di doahra fumm doht,

¹⁴so es ich awl dei lohb fazayla kann, in di doahra funn di Dochtah funn Jerusalem, un fraylich sei kann fa dei saylichkeit.

¹⁵Di heida henn en loch gegrawva un sinn nei kfalla, iahra fees sinn kfanga in di net es si kshteld henn.

¹⁶Da HAH macht sich bekand bei sei gerichtes, un di gottlohsa vadda kfanga bei di eahvet funn iahra aykni hend. (Higgaion. Sela)

¹⁷Di gottlohsa zayla in's grawb gay, un so doon awl di leit es Gott fagessa.

¹⁸Selli es noht henn zayla nett immah fagessa sei, un di hofning funn di oahma gayt nett faloahra.

¹⁹Shtay uf, oh HAH, un loss da mensh nett ivvah-hand havva, loss di leit gricht sei bei diah.

²⁰Mach si sich feicha, oh HAH, loss di leit vissa es si yusht mensha sinn. (Sela)