Read Pennsylvania German Psalm 90 Bible Online

Psalm 90 - Pennsylvania German bible

Psalm 90

¹En gebayt fumm Mosi, da mann funn Gott. Oh Hah, du voahsht unsah voon-blatz fa'immah un immah.

²Eb di hivla gmacht voahra, un eb du di eaht un di veld kshaffa hosht, dann voahsht du Gott funn ayvichkeit zu ayvichkeit.

³Du draysht da mensh zrikk zu shtawb, un sawksht, “Drayyet viddah zrikk, oh kinnah funn mensha.”

⁴En dausend yoah zu diah sinn vi geshtah es yusht fabei ganga is, adda vi ay vatsh zeit deich di nacht.

⁵Du nemsht mensha vekk im shlohf fumm doht, si sinn vi nei graws es meiyets shpraut,

⁶meiyets dutt's shprauda un dutt bleeya, avvah ohvets dutt's favelka un fadadda.

⁷Dei zann macht uns fagay, un veil du bays bisht, sinn miah fagelshtaht.

⁸Du hosht unsah sinda fannich dich ksetzt, un unsah fashtekkeldi sinda raus fannich dei ksicht gedu.

⁹Unsah gans layva kumd zu en end deich dei zann, un unsah yoahra enda vi en ohften.

¹⁰Di leng funn unsah dawwa sinn sivvatzich yoah, adda achtzich, vann miah shteik sinn; avvah di besht funna bringa yusht eahvet un druvvel, si sinn glei ivvah un miah sinn nimmi do.

¹¹Veah fashtayt dei graft vann du bays bisht? Veah vayst di furcht funn deim zann?

¹²So lann uns fa unsah dawwa zayla, so es unsah hatza veisheit greeya.

¹³Kumm zrikk, oh HAH, vi lang zayld's sei? Davvah dei gnechta!

¹⁴Fill uns meiyets mitt dei shtandhaftichi-leevi, so es miah fraylich un froh sinn unsah layva lang.

¹⁵Mach uns froh grawt so feel dawk es du uns dreebsawl gevva hosht, un so feel yoahra es miah druvvel katt henn.

¹⁶Loss dei verka gvissa sei zu dei gnechta, un dei hallichi graft zu iahra kinnah.

¹⁷Loss di gnawt fumm Hah unsah Gott uf uns sei, sayken di eahvet es miah doon mitt unsah hend, yau, sayken di eahvet funn unsah hend.