Read Pennsylvania German Psalm 91 Bible Online

Psalm 91 - Pennsylvania German bible

Psalm 91

¹Sellah es unnich em dach fumm Alli-Haychshta bleibt, zayld im shadda fumm Awlmechticha voona.

²Ich zayl zumm HAH sawwa, “Du bisht mei sayfah Roo-Blatz, un mei shteik Greeks-Haus; du bisht mei Gott es ich drauwa du.”

³Eah zayld dich aus em fekkel-fangah sei fall halda, un funn fadeahblich peshtelens.

⁴Eah dekt dich zu mitt sei feddahra, un du bisht aus di kfoah unnich sei flikkel; sei voahheit is en dach un en shield.

⁵Du zaylsht dich nett feicha veyyich em angsht funn di nacht, adda da arrow es fleekt deich da dawk,

⁶un aw nett veyyich di peshtelens es kumd nachts, adda di fadeahbnis es doht macht am middawk.

⁷En dausend mechta falla an dei seit, un zeyya dausend an dei rechtsi hand, avvah doch's zayld dich nett dreffa.

⁸Du zaylsht yusht gukka mitt dei awwa, un sayna vi di gottlohsa kshtrohft vadda.

⁹Veil du da HAH dei Roo-Blatz gmacht hosht, un da Alli-Haychsht dei Voon-Blatz,

¹⁰dann vatt kenn evil ivvah dich kumma, un aw kenn grankheit nayksht an dei haus kumma.

¹¹Fa eah zayld sei engel en gebott gevva, es si dich heeda in awl dei vayya.

¹²Si zayla dich uf hayva mitt iahra hend, so es du dei foos nett veddah en shtay shtohsht.

¹³Du zaylsht uf da layb un di shlang dredda; da yung layb un di giftich shlang zaylsht du fashtamba.

¹⁴“Veil eah mich leeb hott, dann zayl ich een frei macha,” sawkt da HAH; “veil eah mei nohma vayst, dann zayl ich een heeda.

¹⁵Eah zayld mich roofa, un ich gebb eem andvat; ich zayl bei eem sei in druvvel; ich zayl een frei macha un eem eah gevva.

¹⁶Ich zayl een zufridda macha mitt en lang layva, un zayl eem mei saylichkeit veisa”.