Read Pennsylvania German Psalm 92 Bible Online

Psalm 92 - Pennsylvania German bible

Psalm 92

¹En Psalm. En leet fa da Sabbat-Dawk. Es is goot fa dank gevva zumm HAH, un fa lohb singa zu deim nohma, du Alli-Haychshtah,

²fa dei grohsi leevi fakindicha meiyets, un dei shtandhaftichkeit alli nacht,

³mitt di zeyya-kshtringd harf, un aw mitt di grohs harf.

⁴Du machsht mich fraylich bei dei verka, oh HAH; di verka funn dei hend macha mich singa mitt frayt.

⁵Vi grohs sinn dei verka, oh HAH, un vi deef dei gedanka!

⁶En unksheidah mensh vayst dess nett, un en dummah mensh fashtayt's nett,

⁷es even vann di gottlohsa uf kumma vi graws, un di evil-shaffah shteik vaxa, zayla si endlich vekk gebutzt sei fa'immah.

⁸Avvah du, oh HAH, bisht fa'immah da haychsht.

⁹Fa gukk moll an dei feinda, oh HAH, gukk moll, dei feinda zayla umkumma, un awl di evil-shaffah vadda kshtroit.

¹⁰Du hosht mich shteik gmacht vi da vild ox, un hosht mich ksalbt mitt frish ayl.

¹¹Mei awwa henn mei feinda ksenna falla, un mei oahra henn di gottlohsa keaht greisha es geyyich mich sinn.

¹²Di gerechta zayla goot du vi en palma-bohm, un zayla vaxa vi en cedar-bohm in Lebanon.

¹³Si sinn geblanst im HAH sei haus, un zayla goot du im tempel-hohf funn Gott.

¹⁴Un vann si moll ald sinn, zayla si noch bleeya, fruchtboah sei un gree sei,

¹⁵un zayla sawwa, “Da HAH macht's recht; eah is mei Felsa, un kenn ungerechtichkeit is in eem.”