Read Pennsylvania German Psalm 94 Bible Online

Psalm 94 - Pennsylvania German bible

Psalm 94

¹Oh HAH, da Gott es zrikk betzawla dutt, du Gott es sacha recht machsht, veis dich.

²Shtay uf, du Richtah funn di veld, betzawl di shtolsa zrikk fa vass si fadeend henn.

³Vi lang sella di gottlohsa, oh HAH, vi lang sella di gottlohsa sich froiya?

⁴Si shvetza mitt frechi vadda, awl di evil-shaffah blohsa sich uf.

⁵Si fadrikka dei leit, oh HAH, un dredda dei eahbshaft nunnah.

⁶Si bringa di vitt-fraw un da fremd mann um, un shlauwa doht di kinnah unni eldra.

⁷Si sawwa, “Da HAH saynd uns nett; da Gott fumm Jakob bekimmaht sich nix drumm.”

⁸Gevvet acht, diah unksheidi unnich di leit, vann zaylet diah moll ksheit vadda, diah dummi leit?

⁹Dutt sellah vo's oah gmacht hott nett heahra? Dutt sellah vo's awk gmacht hott nett sayna?

¹⁰Dutt sellah es di heida shtrohft nett shtrohfa, sellah es mensha veisheit land?

¹¹Da HAH vayst di gedanka fumm mensh, si sinn yusht vi en ohften.

¹²Ksaykend is da mann es du shtrohfsht, oh HAH, un es du lansht fumm deim Ksetz.

¹³Du gebsht eem roo funn di dawwa mitt druvvel, biss en grawb gegrawva is fa di gottlohsa.

¹⁴Da HAH lost sei leit nett hokka, un falost aw nett selli es sei eahbshaft sinn.

¹⁵Gerichtes zayld viddah uf gerechtichkeit gebaut vadda, un awl di ufrichticha im hatz gevva sich ivvah ditzu.

¹⁶Veah shtayt uf fa mich geyyich di gottlohsa? Veah shtayt miah bei geyyich di evil-shaffah?

¹⁷Vann da HAH miah nett hilf gevva hett, dann veah ich glei in di veld funn di dohda gvest.

¹⁸Vo ich ksawt habb, “Mei foos is am shlibba,” dann hott dei shtandhaftichi-leevi mich uf kohva, oh HAH.

¹⁹Vo mei angsht grohs voah in miah, dann hott dei drohsht frayt gevva zu mei sayl.

²⁰Du kansht nett aynich sei mitt en uneahlichah richtah-shtool— aynah es letzi ksetza aus shprecht.

²¹Si gayn zammah geyyich's layva funn di gerechta, un fadamma unshuldich bloot.

²²Avvah da HAH is mei feshtah Roo-Blatz, eah is da Felsa es ich mich falossa kann druff.

²³Eah betzawld si zrikk fa iahra ungerechtichkeit, eah bringd si um fa iahra sinda, da HAH, unsah Gott bringd si zu nix.