Read Pennsylvania German Psalm 95 Bible Online

Psalm 95 - Pennsylvania German bible

Psalm 95

¹Kummet un vella singa zumm HAH, vella fraylich singa zumm Felsa funn unsah saylichkeit.

²Vella dankboah fannich een kumma, un een preisa mitt fraylichi psaltah.

³Fa da HAH is en grohsah Gott, da grohs Kaynich ovvich awl di gettah.

⁴Di deefi bletz funn di eaht sinn in sei hand, un di gibbel funn di berga sinn aw sei.

⁵Da say is sei, veil eah een gmacht hott, un sei hend henn's drukka land kshaffa.

⁶Kummet, vella uns nunnah bikka un een ohbayda, vella nunnah gneeya fannich da HAH es uns gmacht hott.

⁷Eah is unsah Gott, un miah sinn di leit funn sei vayt-feld, di shohf funn sei hand. Heit, vann diah sei shtimm heahret,

⁸fashtokket eiyah hatza nett vi diah hend an Meribah, adda an Massa sellah dawk in di vildahnis.

⁹Datt henn eiyah foah-feddah mich ausbroviaht, un henn mich fasucht, even vo si mei eahvet ksenna katt henn.

¹⁰Fa fatzich yoah voahrich bedreebt un gedruvveld mitt selli leit, un ich habb ksawt, “Si sinn leit mitt hatza es iahra ayknah vayk vella, un si doon's nett fa mei vayk nohch gay.”

¹¹So habb ich kshvoahra in meim zann, “Si zayla nee nett in mei roo kumma.”