Read Pennsylvania German Psalm 97 Bible Online

Psalm 97 - Pennsylvania German bible

Psalm 97

¹Da HAH is kaynich, loss di eaht sich froiya, un di islands froh sei.

²Volka un's dunkla sinn um een rumm, sei kaynich-shtool is gegrund uf gerechtichkeit un gericht.

³Feiyah gayt fannich eem heah, un brend sei feinda uf ivvahrawlich.

⁴Sei gviddah gebt helling uf di veld, di eaht saynd's un ziddaht.

⁵Di berga fashmelsa vi wax fannich em HAH, fannich em Hah funn di gans eaht.

⁶Di himla sawwa veyyich sei gerechtichkeit, un awl di leit sayna sei hallichkeit.

⁷Awl selli es abgettah deena vadda fashohmd, selli es braekka veyyich iahra abgettah; baydet een oh, awl diah gettah!

⁸Zion heaht dess un is froh, un di shtett funn Juda froiya sich, ivvah dei gerichtes, oh HAH.

⁹Fa du, oh HAH, bisht da Alli-Haychsht ivvah di gans eaht, du bisht uf kohva ovvich awl di gettah.

¹⁰Diah es da HAH leeb hend, hasset evil; eah heet di sayla funn sei heilichi, eah hald si aus di kfoah funn di gottlohsa iahra hend.

¹¹Es licht sheind uf di gerechta, un frayt sheind uf di ufrichticha im hatz.

¹²Froiyet eich im HAH, diah gerechti, un preiset sei heilichah nohma.