Read Pennsylvania German Shpricha 1 Bible Online

Shpricha 1 - Pennsylvania German bible

Shpricha 1

¹Dess sinn di shpricha fumm Solomon, em Dawfit sei boo, da kaynich funn Israel.

²Dee shpricha sinn kshrivva so es leit veisheit un lanning greeya kenna, un di vadda funn eisicht fashtay kenna;

³dess is so es si lanning greeya kenna fa sich recht ohshikka, in gerechtichkeit, in richta un in eahlich sei;

⁴so es selli vo nett kshvind fashtayn, gland vadda, un so es di yungi leit eisicht un fashtand greeya.

⁵Veah veisheit hott, zayld heicha un may lanna, un veah fashtayt zayld roht greeya in veisheit,

⁶so es eah shpricha un gleichnisa fashtay kann, sell is, leit mitt veisheit iahra vadda un fashtekkeldi mayninga.

⁷Di furcht fumm HAH is da ohfang funn eisicht; avvah dummi leit gukka nunnah uf veisheit un gleicha nett recht ksetzt sei.

⁸Mei kind, heich ab vass dei daett dich land, un faloss nett di sacha es dei maemm dich gland hott.

⁹Iahra lanning is vi shayni blumma uf deim kobb, adda en kett fa dei hals.

¹⁰Mei kind, vann sindah dich lokka, gebb nett ei zu eena.

¹¹Vann si sawwa, “Kumm mitt uns; vella uns fashtekla un voahra fa ebbah sei bloot fageesa, vella uf ebbah unshuldiches lohs gay unni uahsach;

¹²vella si levendich shlukka vi da doht dutt, vella si gans shlukka vi's grawb dutt;

¹³miah kenna alli sadda keshtlichi sacha greeya, miah filla unsah heisah mitt em sach es miah shtayla;

¹⁴kumm un gay mitt uns, alli-ebbah grikt sei shiah fumm sach.”

¹⁵Mei kind, gay nett mitt eena, hald dei fees aus iahra pawt.

¹⁶Iahra fees shpringa zumm evila, si sinn kshvind am bloot fageesa.

¹⁷Es dutt kenn goot fa en fang-net aus shpredda, diveil es di fekkel am vatsha sinn.

¹⁸Dee mennah leiya am voahra fa iahra ayya bloot; si setza en fall es si selvaht doht macht.

¹⁹So gayt's mitt alli-ebbah es greedich is fa feel sach, sell nemd's layva vekk funn selli es iahra sach so greeya.

²⁰Di veisheit rooft laut in di shtrohs; see lost iahra shtimm heahra in di market-bletz.

²¹See rooft naus in di yachtichi shtrohsa, an di doahra funn di shtatt sawkt see dee vadda:

²²“Diah dummi leit, vi lang vellet diah dumm bleiva, vi lang zayla shpoddah gleicha ohhalda shpodda, un vi lang zayla di unksheida eisicht hassa?

²³Nemmet acht vann ich eich zank, gukket moll, ich leah mei geisht aus uf eich, un mach mei vadda bekand zu eich.

²⁴Ich habb naus groofa zu eich, avvah diah hend's nett gedu fa abheicha, ich habb mei hand naus kshtrekt, un nimmand hott sich bekimmaht diveyya.

²⁵Diah hend awl mei roht fa'acht, un hend mei shtrohf nett havva vella.

²⁶So zayl ich lacha vann diah in druvvel sind, un ich zayl shpodda vann angsht eich ivvah-nemd.

²⁷Vann angsht ivvah eich kumd vi en shtoahm, vann druvvel ivvah eich kumd vi en vind-veahvel, un vann dreebsawl un druvvel ivvah eich kumd,

²⁸no zayla si roofa zu miah, avvah ich zayl kenn andvat gevva; si zayla mich oahrich sucha, avvah si zayla mich nett finna,

²⁹veil si eisicht kast henn, un henn em HAH sei furcht nett havva vella.

³⁰Si henn mei roht nett ohgnumma, un henn mich nett glost si recht setza,

³¹so zayla si di frucht essa funn iahra ayknah vayk, un zayla satt sei mitt di frucht funn iahra shkeems.

³²Di dumma drayya vekk un sell macht si doht; di aldvannisha sinn unbekimmaht un kumma um.

³³Avvah veah mich abheicht zayld aus di kfoah layva; eah zayld im roo voona un sich nett feicha funn evil.”