Read Pennsylvania German Shpricha 10 Bible Online

Shpricha 10 - Pennsylvania German bible

Shpricha 10

¹Dess sinn em Solomon sei shpricha: En boo mitt veisheit macht sei daett froh, avvah en unksheidah boo macht sei maemm bedreebt.

²Shtoft es uneahlich grikt voah dutt diah kenn goot, avvah gerechtichkeit hald dich aus di kfoah fumm doht.

³Da HAH lost di gerechta nett hungahrich gay, avvah eah hald di gottlohsa funn greeya vass si havva vella.

⁴Fauli hend macha ebbah oahm, avvah fleisichi hend macha ebbah reich.

⁵Veah's frucht sammeld im summah is en boo mitt veisheit, avvah veah shlohft deich di eahn is en shandlichah boo.

⁶Sayya sinn uf em kobb funn di gerechta, avvah unfashtand dekt's maul funn di gottlohsa zu.

⁷Es ohdenkes funn di gerechta is en sayya, avvah da nohma funn di gottlohsa vatt glei fagessa.

⁸Ebbah mitt veisheit im hatz dutt vass eah kaysa is, avvah ebbah es dumhayda shvetz kumd zu nix.

⁹Veah eahlich laybt, lawft unni kfoah, avvah veah uneahlich laybt vatt auskfunna.

¹⁰Sellah es sei awk blikt geyyich ebbah, macht druvvel, un sellah es dumhayda shvetzt kumd zu nix.

¹¹Es maul funn di gerechta is vi en vassah-shpring funn layva, avvah unfashtand dekt's maul funn di gottlohsa zu.

¹²Da hass macht shtreit, avvah di leevi dekt awl unsah sinda zu.

¹³Veisheit is kfunna uf di leftz funn di fashtendlicha, avvah en gayshel is fa da bukkel funn di unfashtendlicha.

¹⁴Ebbah mitt veisheit haybt zrikk vass eah vayst, avvah's maul fumm unksheida frohkt fa druvvel.

¹⁵'S geld fumm reicha is sei shteiki shtatt, avvah di oahma gayn unnah veil si kenn geld henn.

¹⁶Da lohn funn di gerechta bringd eena layva, avvah di gottlohsa vadda betzawld mitt en shtrohf.

¹⁷Veah sich famohna lost is uf em vayk zu layva, avvah veah's recht-setza nett ohnemd gayt fafiaht.

¹⁸Veah sei hass fashtekkeld, hott leftz es leeya, un ebbah es kshvetzah shtroit is nett ksheit.

¹⁹Vo feel vadda sinn, datt is di sind aebt fa sei, avvah veah sei leftz zu haybt, hott veisheit.

²⁰Di zung funn di gerechta is vi fei silvah, avvah di meind funn di gottlohsa is nett feel veaht.

²¹Di leftz funn di gerechta helfa feel, avvah di unksheida kumma um veil si kenn veisheit henn.

²²Da sayya fumm HAH macht em reich, un gebt kenn dreebsawl mitt.

²³En unksheidah mensh gleicht letz du, avvah en mann mitt eisicht gleicht veisheit.

²⁴Vass da gottlohs sich feicht diveyya kumd uf een, avvah da gerecht mann grikt vass eah havva vill.

²⁵Vann da shtoahm moll fabei is, dann sinn di gottlohsa nimmi datt, avvah di gerechta shtayna shtandhaftich fa'immah.

²⁶Vi essich zu di zay un shmohk zu di awwa, so is da faul mann zu selli es een shikka shaffa.

²⁷Di furcht fumm HAH macht's layva lengah, avvah di yoahra funn di gottlohsa vadda fakatzt.

²⁸Di hofning funn di gerechta is frayt, avvah di hofning funn di gottlohsa kumd zu nix.

²⁹Da vayk fumm HAH is en Roo-Blatz zu di ufrichticha, avvah sei vayk bringd fadauves zu selli es letz doon.

³⁰Di gerechta vadda nee nett naus kshtohsa, avvah di gottlohsa zayla nett im land bleiva.

³¹'S maul funn di gerechta shvetzt mitt veisheit, avvah di zung es evil shvetzt vatt abkshnidda.

³²Di leftz funn di gerechta shvetza kshikti sacha, avvah's maul funn di gottlohsa shvetzt falshheit.