Read Pennsylvania German Shpricha 11 Bible Online

Shpricha 11 - Pennsylvania German bible

Shpricha 11

¹Da HAH hast en vohk es uneahlich veekt, avvah en eahlich gvicht is eem kfellich.

²Vo shtolsheit is dann kumd glei shohm, avvah veisheit is bei di daymeedicha.

³Iahra unshuld fiaht di ufrichticha, avvah iahra falshheit bringd di uneahlicha zu nix.

⁴Feel geld helft nix am dawk fumm zann, avvah gerechtichkeit hald dich aus di kfoah fumm doht.

⁵Di gerechtichkeit funn di unshuldicha macht iahra vayk grawt, avvah di gottlohsa falla bei iahra aykni ungettlichkeit.

⁶Di gerechtichkeit funn di ufrichticha hald si aus di kfoah, avvah di uneahlicha vadda kfanga bei iahra ayknah lusht.

⁷Vann da gottlohs mensh shtaubt, dann is sei hofning faloahra, di graft es eah sich falossa hott druff kumd zu nix.

⁸Da gerecht mensh is aus di kfoah kalda funn druvvel, un's kumd uf da gottlohs in seim blatz.

⁹Da gottlohs mensh kann sei nochbah zu nix bringa mitt seim maul, avvah deich eisicht doon di gerechta sich aus di kfoah halda.

¹⁰Vann alles goot gayt mitt di gerechta, dann dutt di shtatt sich froiya, un vann di gottlohsa umkumma, greisha di leit mitt frayt.

¹¹Da sayya funn di ufrichticha baut di shtatt uf, avvah deich's maul funn di gottlohsa is see nunnah grissa.

¹²En unksheidah mensh dutt sei nochbah nunnah, avvah en ksheidah mensh bleibt shtill.

¹³Ebbah es kshvetzah drawkt hald sacha nett ruich, avvah ebbah es gedraut sei kann hald sei maul ruich.

¹⁴Vo's kenn goodah roht hott, dann gayn di leit unnah, avvah vo feel roht-gevvah sinn, datt sinn di leit aus di kfoah.

¹⁵Veah goot shtayt fa en fremdah sei shulda, een zayld's shpeida, avvah sellah es nett gleicht goot shtay fa ebbah, is bessah ab.

¹⁶En goot-maynichi fraw grikt eah, avvah unfashtendlichi mennah vadda yusht reich.

¹⁷En bamhatzichah mann dutt sich selvaht goot, avvah en unfashtendlichah mann dutt sich shawda.

¹⁸En gottlohsah mensh fadeend lohn es nix veaht is, avvah veah gerechtichkeit sayt, grikt en goodah lohn.

¹⁹Veah shtandhaftich is in gerechtichkeit zayld layva, avvah veah evil nohch gayt kumd um.

²⁰Da HAH hast mensha mitt falshi hatza, avvah eah hott frayt mitt selli es unshuldich lawfa.

²¹Du kansht dich falossa druff es di gottlohsa nett unkshtrohft gayn, avvah selli es gerecht sinn vadda frei ksetzt.

²²Vi en goldichah ring in en sau iahra shnaut, so is en shayni fraw unni goodah fashtand.

²³Vass gerechti leit vinsha shaft goot aus, avvah di hofning funn di gottlohsa end in zann.

²⁴Ay-ebbah gebt geahn, un grikt yusht noch may; en anrah haybt zrikk vass eah gevva sett, un vatt yusht noch oahmah.

²⁵Veah reichlich gebt, zayld goot ab sei, un veah anri reichlich gebt zu drinka, zayld selvaht nett fadashta.

²⁶Ebbah es frucht zrikk haybt vatt faflucht bei di leit, avvah sayya kumma uf sellah es es fakawft.

²⁷Veah goodes sucht, deah grikt goodes, avvah veah evil sucht, deah grikt evil.

²⁸Veah sich falost uf sei feel geld zayld falla, avvah di gerechta zayla vaxa vi en greeni blatt.

²⁹Veah druvvel in sei ayya haus bringd, zayld da vind eahva, un da unksheit zayld en gnecht sei zumm mann mitt veisheit.

³⁰Di frucht funn di gerechta is en bohm funn layva, un veah mensha sayla sammeld, hott veisheit.

³¹Vann di gerechta greeya vass zu eena heaht uf di eaht, vi feel may doon di gottlohsa un di sindah.