Read Pennsylvania German Shpricha 12 Bible Online

Shpricha 12 - Pennsylvania German bible

Shpricha 12

¹Ennich ebbah es eisicht leeb hott, gleicht recht ksetzt sei, avvah ennich ebbah es nett gleicht recht ksetzt sei is dumm.

²En goodah mann is kfellich zumm HAH, avvah eah fadamd da mann es evil im sinn hott.

³En mensh is nett shtandhaftich gmacht deich ungerechtichkeit, avvah di vatzla funn di gerechta kenna nett raus gezowwa sei.

⁴En goodi fraw is vi en krohn zu iahra mann, avvah ayni es een fashohmd is vi grebs in sei gnocha.

⁵Di gedanka es di gerechta henn sinn recht, avvah da roht funn di gottlohsa is fafiahrich.

⁶Di vadda funn di ungettlicha sinn en fall fa bloot fageesa, avvah's maul funn di ufrichticha macht si frei.

⁷Di gottlohsa vadda kshtatzt un zayla nimmi sei, avvah's haus funn di gerechta shtayt shtandhaftich.

⁸En mann vatt glohbt fa sei veisheit, avvah en mann mitt en fashtatzti meind vatt fa'acht.

⁹'Sis bessah fa nett hohch ohksenna sei mitt yusht ay gnecht, es vi ebbah es grohs sei vill avvah eah hott kenn broht.

¹⁰En gerechtah mann gebt acht uf sei fee, avvah's hatz funn di gottlohsa is nett bamhatzich.

¹¹Veah-evvah es sei land shaft, zayld feel broht havva, avvah veah unaydichi sacha nohch gayt, is nett shmeaht.

¹²Di gottlohsa sucha yusht fa shawda du, avvah di vatzel funn di gerechta bringd frucht.

¹³En evilah mann vatt kfanga in sei aykni falshi vadda, avvah di gerechta halda sich aus druvvel.

¹⁴Feel goodes kumd zumm mann deich di frucht funn seim maul, un deich di eahvet funn sei hend grikt eah vass eah fadeend hott.

¹⁵Da unksheit mensh maynd sei ayknah vayk is recht, avvah ebbah mitt veisheit nemd roht.

¹⁶Vann en unksheidah mensh zannich vatt, veist eah's grawt, avvah en shmeahdah mann fa'acht's vann ebbah veesht shvetzt zu eem.

¹⁷Veah di voahheit sawkt, sawkt vass recht is, avvah en falshah zeiyah sawkt leeya.

¹⁸Vadda es zu kshvind kshvetzt sinn, shtecha vi en shvatt, avvah di zung funn selli mitt veisheit, bringd hayles.

¹⁹Leftz es di voahret sawwa, bleiva fa'immah, avvah en zung es leekt, shtayt nett lang.

²⁰Selli es evil im sinn henn, henn falshi hatza, avvah selli es goodes im sinn henn, henn fridda.

²¹Nix shlechtes kumd ivvah di gerechta, avvah di gottlohsa henn nix es druvvel.

²²Da HAH hast meilah es leeya, avvah eah hott frayt mitt di shtandhafticha.

²³En shmeahdah mann hald zu sich selvaht vass eah vayst, avvah en dummah mann veist vi dumm es eah is.

²⁴Di fleisich hand zayld roola, avvah en faulah mensh vatt en gnecht.

²⁵En engshtlich hatz drikt en mann nunnah, avvah en freindlich vatt gebt eem frayt.

²⁶Da gerecht is bessah ab es sei nochbah avvah da vayk funn di gottlohsa dutt si fafiahra.

²⁷Da faul mann kocht's flaysh nett es eah fangd, avvah da shtandhaftich mann gebt acht uf sei sach.

²⁸Im vayk funn gerechtichkeit is layva, un in selli pawt is kenn doht.