Read Pennsylvania German Shpricha 13 Bible Online

Shpricha 13 - Pennsylvania German bible

Shpricha 13

¹En boo mitt veisheit heicht ab vass sei faddah eem sawkt, avvah en shpoddah nemd di shtrohf nett oh.

²Di frucht funn en mann sei maul gebt eem goodi sacha, avvah selli es fafiahra, vella yusht fechta.

³Veah sei maul heet, hald sei layva aus di kfoah, avvah veah sei kshvetz nett heet, kumd zu nix.

⁴En faulah mann vill sach havva un eah grikt nix, avvah di fleisicha greeya vass si vella.

⁵Di gerechta hassa vass falsh is, avvah di gottlohsa bringa shohm un shanda.

⁶Di gerechtichkeit heet di ufrichticha, avvah ungettlichkeit macht di sindah falla.

⁷Ay mann lost oh eah is reich, un hott nix, avvah en anrah lost oh eah is oahm, un is oahrich reich.

⁸En reichah mann kann sei layva aus di kfoah kawfa, avvah di oahma henn nix fa betzawla.

⁹Es licht funn di gerechta brend fraylich, avvah's licht funn di gottlohsa gayt aus.

¹⁰Unnich di shtolsa is immah shtreit, avvah veisheit is kfunna bei selli es roht nemma.

¹¹Reichheit es letz grikt voah, vatt vennichah un vennichah, avvah ebbah es geddaht bei shaffa macht's vaxa.

¹²Hofning es voahra muss, gebt em hatz angsht, avvah en falanga es folfild is, is vi en bohm funn layva.

¹³Veah's vatt fa'acht, bringd sich selvaht zu nix, avvah veah's gebott fircht, grikt en fadeensht.

¹⁴Di lanning es gevva is bei selli mitt veisheit, is en shpring funn layva, un hald ebbah aus em fang-shtrikk fumm doht.

¹⁵Goodi eisicht vatt hohch ohksenna, avvah da vayk funn di gottlohsa is hatt.

¹⁶En fashtendlichah mann dutt alles mitt eisicht, avvah da unksheit mann veist vi dumm es eah is.

¹⁷En gebodda-drawwah es nett gedraut sei kann, grikt leit in druvvel, avvah aynah es gedraut sei kann bringd hayles.

¹⁸Veah's nett ohnemd vann eah recht ksetzt vatt, hott oahmoot un shanda, avvah sellah es es ohnemd is hohch ohksenna.

¹⁹Vann en falanga folfild vatt, is es blesiahlich zumm hatz, avvah unksheidi leit gleicha sinda nett falossa.

²⁰Veah mitt mennah funn veisheit lawft, grikt veisheit, avvah veah rumm gayt mitt di unksheida dutt sich selvaht vay.

²¹Druvvel gayt sindah nohch, avvah di gerechta vadda zrikk betzawld mitt goodi sacha.

²²En goodah mann lost en eahbshaft zu sei kinds-kinnah, avvah di reichheit funn di sindah gayt zu di gerechta.

²³Di oahma iahra feldah gevva feel ess-sach, avvah deich unrecht vatt's vekk gnumma.

²⁴Veah da shtekka shpoaht mitt seim boo hast een, avvah veah een leeb hott macht een heicha.

²⁵Da gerecht hott genunk zu essa fa een satt macha, avvah da bauch fumm gottlohsa gayt hungahrich.