Read Pennsylvania German Shpricha 14 Bible Online

Shpricha 14 - Pennsylvania German bible

Shpricha 14

¹Di fraw mitt veisheit baut iahra haus uf, avvah en unksheit veibsmensh fadaubt iahra's bei vass see dutt.

²Sellah es ufrichtich lawft fircht da HAH, avvah sellah mitt grummi vayya fa'acht een.

³Es kshvetz fumm unksheida is en shtekka fa sei shtolsheit shtrohfa, avvah's kshvetz funn selli mitt veisheit hald si aus di kfoah.

⁴Vo kenn oxa sinn, datt is da frucht-kashta leah, avvah funn di graft fumm ox kumd en grohsi eahn.

⁵En shtandhaftichah zeiyah dutt nett leeya, avvah en falshah zeiyah dutt immah leeya.

⁶En shpoddah sucht fa veisheit un find see nett, avvah eisicht kumd kshvind zu di ksheida.

⁷Hald dich vekk fumm unksheida mann, fa du griksht kenn eisicht funn sei vadda.

⁸Ebbah es veisheit hott, hott di gawb fa da recht vayk gay, avvah unksheidi leit fafiahra sich selvaht un gayn letz.

⁹Unksheidi leit macha en kshpott funn sinda, avvah ufrichtichi leit sinn froh fa fagevva sei.

¹⁰Es hatz laynich vayst sei aykni dreebsawl, un nimmand shunsht kann en dayl havva fumm hatz sei frayt.

¹¹'S haus fumm gottlohsa vatt zammah grissa, avvah da tent fumm ufrichticha bleibt shtay.

¹²Es is en vayk es recht seemd zumm mensh, avvah im end fiaht's zumm doht.

¹³Even vann ebbah lacht, kann sei hatz am vay du sei, un frayt kann uf enda in dreebsawl.

¹⁴Di gottlohsa vadda zrikk betzawld fa iahra vayya, avvah en goodah mann zayld zufridda sei mitt seini.

¹⁵En mann es nett zu shmeaht is glawbt ennich ebbes, avvah en begawbdah mann denkt an vass eah am du is.

¹⁶En mann mitt veisheit gebt acht un drayt vekk funn evil, avvah en dummah mann gebt nix drumm un is unbekimmaht.

¹⁷En mann es kshvind bays vatt dutt dummi sacha, un en shlichtichah mann vatt kast.

¹⁸Di dumma eahva yusht noch may dumheit, avvah selli mitt veisheit sinn gekrohnd mitt eisicht.

¹⁹Evili leit zayla sich nunnah bikka fannich di gooda leit, un di gottlohsa an di deahra funn di gerechta.

²⁰Di oahma sinn nunnah gedu even bei iahra nochbahra, avvah di reicha henn feel freind.

²¹Sellah es nunnah gukt uf sei nochbah, sindicht, avvah sellah es bamhatzich is zu di oahma is ksaykend.

²²Selli es im sinn henn fa evil du gayn ab funn di pawt, avvah selli es im sinn henn fa goot du, finna leevi un shtandhaftichkeit.

²³Selli es hatt shaffa greeya ebbes gedu, avvah selli es yusht shvetza diveyya vadda oahm.

²⁴Da krohn funn selli mitt veisheit is iahra reichheit, avvah di dumheit fiaht yusht zu noch may dumheit.

²⁵En eahlichah zeiyah kann ebbah fumm doht halda, avvah en falshah zeiyah is zvay-ksichtich.

²⁶Sellah es da HAH firchta dutt hott en shteikah glawva, un sei kinnah vadda aus di kfoah kalda.

²⁷Di furcht fumm HAH is en shpring funn layva, un hald ebbah aus em fang-shtrikk fumm doht.

²⁸Vann en kaynich feel leit hott, hott eah grohsi hallichkeit, avvah unni feel leit kumd eah zu nix.

²⁹Ebbah es nett kshvind bays vatt hott veisheit, avvah ebbah es kshvind bays vatt veist vi dumm es eah is.

³⁰En meind es fridda hott, gebt em leib ksundheit, avvah fagunsht fafauld di gnocha.

³¹Veah-evvah es di oahma nunnah drett, leshtaht Sellah es si gmacht hott, avvah ebbah es bamhatzich is zu selli in noht, eaht Gott.

³²Da gottlohs bringd sei ayknah nunnah-fall bei's evil es eah dutt, avvah even im doht sinn di gerechta gedrohsht.

³³Di veisheit is im hatz funn selli mitt eisicht, un even zu di unksheida macht see sich bekand.

³⁴Gerechtichkeit haybt en folk uf, avvah sinda bringa en shohm zu ennichi leit.

³⁵En kaynich hott frayt mitt en gnecht es veisheit hott, avvah en shandlichah gnecht macht een bays.