Read Pennsylvania German Shpricha 15 Bible Online

Shpricha 15 - Pennsylvania German bible

Shpricha 15

¹En goot-maynich andvat drayt da zann vekk, avvah shaufi vadda shtadda da zann uf.

²En zung mitt veisheit macht di lanning leeblich, avvah's maul fumm unksheida shvetzt yusht dumhayda.

³Di awwa fumm HAH sinn ivvahrawlich, un sinn am di gooda un di evila leit vatsha.

⁴En zung es hayld, is vi en bohm funn layva, avvah en fafiahrichi zung macht da geisht moot faliahra.

⁵En dummah mann nemd seim faddah sei shtrohf nett oh, avvah veah-evvah es sich lost recht ksetzt sei is shmeaht.

⁶Im gerechta sei haus sinn feel keshtlichi sacha, avvah vass da gottlohs einemd gebt eem yusht druvvel.

⁷Di leftz funn sellah es veisheit hott, shtroiya goodah roht, avvah's hatz funn di unksheida is nett so.

⁸Es opfah funn di gottlohsa is grauslich zumm HAH, avvah di gebaydah funn di ufrichticha sinn eem kfellich.

⁹Da vayk funn di gottlohsa is grauslich zumm HAH, avvah eah leebt selli es gerechtichkeit nohch gayn.

¹⁰Sellah es da vayk falost, vatt oahrich kshtrohft; sellah es hast recht ksetzt sei, kumd um.

¹¹Da doht un's grawb sinn abgedekt fannich em HAH, vi feel may sinn di hatza funn mennah!

¹²Da shpoddah gleicht nett kshtrohft sei; eah gayt nett zu selli es veisheit henn.

¹³En fraylich hatz macht en fraylich ksicht, avvah vann's hatz bedreebt is, dann hott da geisht moot faloahra.

¹⁴Leit es shmeaht sinn vella noch may lanning, avvah's maul funn di unksheida feedaht sich mitt dumheida.

¹⁵Awl di dawwa funn di bedreebda sinn hatt, avvah en fraylich hatz is vi en grohs essa alli dawk.

¹⁶'Sis bessah fa bissel havva mitt di furcht fumm HAH, es vi feel geld havva un gedruvveld sei.

¹⁷Bessah en essa funn goahra sach mitt leevi, es vi en feddah ox mitt hass.

¹⁸Ebbah es kshvind bays vatt shtatt shtreit uf, avvah en geduldichah mann keeld da zann ab.

¹⁹Da vayk fumm faula mann is ivvah-gvaxa mitt danna, avvah di pawt funn di ufrichticha is en gladdah vayk.

²⁰En boo mitt veisheit macht sei daett froh, avvah en dummah mann gebt nix um sei maemm.

²¹Dumheit is en frayt zu di unksheida, avvah en fashtendlichah mann lawft grawt.

²²Unni roht gayt sell letz vass ma im sinn hott fa du, avvah mitt feel roht shaft alles goot aus.

²³Es is en frayt zu en mann vann eah en goot andvat gebt, un vi goot is es recht vatt an di recht zeit!

²⁴Da vayk funn layva fiaht nuff-zuss fa selli mitt veisheit, so es si nett nunnah in's grawb gayn.

²⁵Da HAH reist's haus funn di shtolsa nunnah, avvah eah vatsht ivvah's land funn di vitt-fraw.

²⁶Da HAH hast di gedanka funn di gottlohsa, avvah di vadda funn di reina sinn eem kfellich.

²⁷Sellah es greedich is macht druvvel fa sei haus-hohld, avvah sellah es uneahlichi kshenkah hast zayld layva.

²⁸Di meind funn di gerechta denkt eb si andvat gebt, avvah's maul funn di gottlohsa shpautzt yusht evili sacha.

²⁹Da HAH is veit vekk funn di gottlohsa, avvah eah heaht's gebayt funn di gerechta.

³⁰Freindlichi awwa macha's hatz froh, un goodi zeiya macha di gnocha ksund.

³¹Veah-evvah es abheicht zu roht es layva gebt, zayld voona unnich selli mitt veisheit.

³²Veah sich nix sawwa lost dutt sich selvaht vay, avvah veah roht ohnemd grikt lanning.

³³Di furcht fumm HAH land en mann veisheit havva, un daymoot kumd eb grohsi eah.