Read Pennsylvania German Shpricha 16 Bible Online

Shpricha 16 - Pennsylvania German bible

Shpricha 16

¹Vass da mensh im sinn hott fa du kumd fumm mensh, avvah sell es di zung sawwa soll kumd fumm HAH.

²Ebbah mecht denka es sei vayya sinn recht, avvah da HAH veekt da geisht fumm mensh.

³Gebb ivvah zumm HAH sell es du du vitt, un du zaylsht dei eahvet recht ausdrawwa.

⁴Da HAH hott en uahsach fa alles es eah dutt, even fa di gottlohsa am dawk funn fadauves.

⁵Ebbah mitt en shtols hatz is grausam zumm HAH, un eah zayld geviss nett unkshtrohft gay.

⁶Deich shtandhaftichi-leevi un voahheit vadda sinda fagevva, un deich di furcht fumm HAH hald en mann sich vekk funn evil.

⁷Vann en mann sei vayya kfellich sinn zumm HAH, dann macht eah even sei feinda in fridda layva mitt eem.

⁸Es is bessah fa vennich havva mitt gerechtichkeit, es vi feel havva es uneahlich grikt voah.

⁹En mann macht aus vass eah du zayld, avvah da HAH fiaht sei shritt.

¹⁰Em kaynich sei leftz shvetza fa Gott; sei maul dutt nett letz richta.

¹¹En eahlichi vohk un gvichtah sinn fumm HAH, eah is bekimmaht veyyich awl di gvichtah im sakk.

¹²Kaynicha hassa leit es unrecht doon, fa deich gerechtichkeit vatt iahra kaynich-shtool fesht gmacht.

¹³Kaynicha henn blesiah in eahlichi leftz, si leeva en mann es di voahret sawkt.

¹⁴En kaynich sei zann is vi en gebodda-drawwah funn doht, avvah ebbah mitt veisheit zayld broviahra een abkeela.

¹⁵Vann en kaynich sei ksicht freindlich is, dann bringd's layva. Sei gnawt is vi en reyya-volk im free-yoah.

¹⁶Es is bessah fa veisheit greeya es vi fa gold havva, un's is bessah fa eisicht nemma es vi silvah.

¹⁷Da vayk funn di ufrichticha drayt vekk funn evil, un veah sei vayk vatsht hald sei layva.

¹⁸Di shtolsheit gayt fannich's fadauves heah, un da hohchmoot fannich em fall.

¹⁹'Sis bessah fa daymeedich sei mitt di oahma, es vi fa kshtohla shtoft fadayla mitt di shtolsa.

²⁰Veah-evvah es acht gebt vann eah ebbes dutt, zayld goot du, un ksaykend is sellah es sei fadrauwa in da HAH dutt.

²¹En mann mitt veisheit vatt ohksenna es aynah mitt eisicht, un leeblichi vadda macht leit noch may eisayna mitt eem.

²²Di veisheit is en shpring funn layva zu selli es veisheit henn, avvah dummi leit sinn kshtrohft bei iahra dumhayda.

²³Es hatz funn en mann mitt veisheit veist sich in seim kshvetz, un vass eah sawkt macht leit eisayna mitt eem.

²⁴Blesiahlichi vadda sinn vi hunnich, si sinn sees zu di sayl un hayla di gnocha.

²⁵Es hott en vayk es recht seemd zu en mann, avvah's end funn sellem vayk is da doht.

²⁶En shaff-mann sei abeditt shaft fa een, sei hungah dreibt een on.

²⁷En nix-nutzichah mann hott evil im sinn, un sei kshvetz is vi hays feiyah.

²⁸En gottlohsah mensh shtroit shtreit, un aynah es kshvetzah drawkt kumd zvishich leit es freind sinn.

²⁹En mann es gvald yoost fafiaht sei nochbah, un fiaht een in en vayk es nett goot is.

³⁰Veah vinkt mitt sei awwa, hott nix goodes im sinn, un veah mohshend mitt di leftz hott evil in meind.

³¹Veis-grohwi hoah is vi en krohn funn hallichkeit, un is fadeend bei en gerecht layva fiahra.

³²Es is bessah fa nett kshvind bays vadda es vi fa mechtich sei, un veah sei zann meishtaht, is bessah es aynah es en shtatt ivvah-nemd.

³³Es lohs vatt gezowwa bei's in en shohs shmeisa, avvah's fald vi da HAH es havva vill.