Read Pennsylvania German Shpricha 17 Bible Online

Shpricha 17 - Pennsylvania German bible

Shpricha 17

¹'Sis bessah fa en drukkani grusht broht havva mitt fridda, es vi en haus foll leit am essa mitt shtreit.

²En gnecht mitt veisheit zayld roola ivvah da boo es nett heicht, un zayld en dayl funn di eahbshaft greeya vi ayns funn di breedah.

³Vi gold un silvah broviaht is bei feiyah, so vadda di hatza broviaht beim HAH.

⁴En evilah mensh heicht ab zu evili leftz, un aynah es leekt heicht ab zu en falshi zung.

⁵Veah di oahma fashpott dutt Deah nunnah es si gmacht hott, un veah blesiah nemd in ebbah shunsht sei druvvel zayld kshtrohft vadda.

⁶Kinds-kinnah sinn da krohn funn aldi leit, un di eah funn di kinnah is iahra eldra.

⁷Es shtayt en dummah mann nett goot oh fa grohs shvetza, un noch feel vennichah sett en roolah leeya.

⁸Geld gevva hinna rumm is vi en keshtlichah shtay zu sellem es es gebt, eah maynd es grikt eem alles es eah brauch.

⁹Veah letz gedu vattt un fagebt's, is am sucha fa leevi, avvah veah ohhald shvetza diveyya faliaht sei freind.

¹⁰En shmeahdah mann land may bei aymol gezankt vadda, es vi en dummah dutt bei en hunnaht mohl gegaysheld vadda.

¹¹En evilah mensh sucht yusht fa sich shteibahra; en shlechtah gebodda-drawwah vatt geyyich een kshikt.

¹²'Sis bessah fa en muddah beah ohdreffa es iahra glenni kshtohla grikt hott, es vi en unksheidah mensh am sei dumhayda ausdrawwa.

¹³Vann en mensh evil fa goodes zrikk betzawld, dann zayld evil sei haus nee nett falossa.

¹⁴Da ohfang funn shtreit is vi en damm am rinna, so shtobbet's eb's graysah vatt.

¹⁵Di shuldicha frei gay lossa, adda di unshuldicha shtrohfa— da HAH hast si awl zvay.

¹⁶Vass goot is geld fa veisheit kawfa in di hand funn en unksheidah, vann eah's nett dutt fa lanna?

¹⁷En freind gebt leevi di gans zeit, un en broodah is geboahra fa helfa an di zeit funn noht.

¹⁸Yusht en mann unni goodah fashtand macht en bund, un fashprecht fa goot shtay fa sei nochbah.

¹⁹Sellah es en leevi hott fa zadda gleicht shtreit, un sellah es sei doah hohch macht is am gukka fa druvvel.

²⁰En mann mitt en grummi meind zayld nett goot du, un ebbah mitt en falshi zung fald in druvvel.

²¹En unksheidah boo bringd dreebsawl zu sei daett; da daett funn en unksheidah boo hott kenn frayt.

²²En fraylich hatz macht ebbah ksund, avvah en bedreebdah geisht drikkeld di gnocha uf.

²³En gottlohsah mensh nemd geld hinna rumm, un fabeekt da vayk es recht is.

²⁴En eisichtichah mann hald sei awwa uf veisheit, avvah em dumma sei awwa sinn uf em end funn di gans veld.

²⁵En unksheidah boo bringd dreebsawl zu sei daett, un macht sei maemm es een gedrawwa hott bedreebt.

²⁶Es is nett goot fa en unshuldichah mann shtrohfa, un aw nett fa evvahshti gayshla veil si eahlich sinn.

²⁷En mensh mitt eisicht sawkt nett feel, un en mann es sacha fashtayt, vatt nett ufkshtatt.

²⁸Even en unksheidah mensh es shtill bleibt is gnumma fa veisheit havva; vann eah sei maul zu hald is eah fanumma fa shmeaht sei.