Read Pennsylvania German Shpricha 18 Bible Online

Shpricha 18 - Pennsylvania German bible

Shpricha 18

¹En mann es sich laynich hald is yusht bekimmaht veyyich sich selvaht, un gayt geyyich alles es goot un recht is.

²En unksheidah mensh hott kenn blesiah fa ebbes fashtay, avvah yusht fa anri sawwa vass eah denkt.

³Vann ungettlichkeit kumd, so dutt fa'achtung; mitt di shand kumd da shohm.

⁴Di vadda funn en mann sei maul sinn vi deef vassah; un di vadda funn veisheit vi vassah es lawft funn en deefi shpring.

⁵Es is nett recht fa en shuldichah mann gay lossa, un da unshuldich mann halda funn sei recht greeya.

⁶Em unksheida sei leftz bringa shtreit, un sei maul is am frohwa fa shlayk.

⁷Em unksheida sei maul bringd een zu nix, sei leftz sinn en fall zu sich selvaht.

⁸Di vadda fumm kshvetza-drawwah sinn vi sees ess-sach, si vadda glatt eikshlukt nunnah in da bauch.

⁹Aynah es nett hatt shaft in sei eahvet, is en broodah zu sellah es zammah reist.

¹⁰Da nohma fumm HAH is vi en shteikah tavvah, en gerechtah mann kann datt anna shpringa un is sayf.

¹¹Es geld fumm reicha is sei shteiki shtatt, eah maynd's is en hohchi vand es een aus di kfoah hald.

¹²Eb en mann fald, is sei hatz shtols, avvah eb di eah, kumd daymeedichkeit.

¹³Ebbah es andvat gebt eb eah abheicht, is unksheit un shandlich.

¹⁴En mann sei geisht helft eem deich di grankheit, avvah vann da moot faloahra is, veah kann's drawwa?

¹⁵Di shmeaht meind grikt noch may lanning, un's oah mitt veisheit sucht eisicht.

¹⁶Em mann sei kshenk macht di deah uf fa een, un bringd een fannich hohch-geahdi mennah.

¹⁷Da eahsht es uf shtayt fa shvetza seemd recht sei, biss da annah ohfangd een sacha frohwa.

¹⁸Da lohs zeeya bringd en end zu shtreit, un seddeld di sacha zvishich di mechticha.

¹⁹En broodah es grikt is, is haddah fa nayksht kumma ditzu es en shtatt mitt vanda; shtreit is vi di rikkel es es doah funn en kaynich-gebei zu hayva.

²⁰Di frucht funn en mann sei maul macht een satt, un vass sei leftz sawwa macha een zufridda.

²¹Da doht un's layva sinn in di gvald funn di zung, un selli es gleicha shvetza, missa di frucht funn iahra kshvetz essa.

²²Sellah es en fraw find, find en goot ding; un eah is em HAH kfellich.

²³Di oahma missa ohhalda un bedla, avvah di reicha shvetza veesht zrikk.

²⁴Samm funn em sei freind bleiva nett bei em, avvah en rechtah freind bleibt naychah bei em es en broodah.