Read Pennsylvania German Shpricha 19 Bible Online

Shpricha 19 - Pennsylvania German bible

Shpricha 19

¹'Sis bessah fa en oahmah mann sei es lawft in unshuld, es vi en unksheidah mann sei es di unvoahret sawkt mitt sei leftz.

²'Sis nett goot fa fleisich sei unni eisicht; veah zu shnell lawft mitt di fees fafayld da vayk.

³En unksheidah mann fadaubt's fa sich selvaht, avvah no vatt eah bays un pshuldicht da HAH.

⁴Bei reich sei grikt ma feel freind, avvah da oahm mann vatt falossa bei sei freind.

⁵En falshah zeiyah zayld nett unkshtrohft gay, un sellah es leeya sawkt zayld nett frei gay.

⁶Feel shmaychla sich oh mitt di evvahshta, un alli-ebbah is en freind funn selli es kshenkah ausgevva.

⁷En oahmah mann is kast bei sei breedah; vi feel may doon sei freind sich vekk halda funn eem! Eah gayt eena nohch mitt vadda, avvah si kenna nett kfunna sei.

⁸Sellah es veisheit grikt leebt sei aykni sayl, un sellah es hald vass eah land zayld goot du.

⁹Sellah es falshi zeiya gebt, zayld nett unkshtrohft gay, un sellah es leeya sawkt kumd um.

¹⁰'Sis nett shiklich es en unksheidah reich layva sett, vi feel vennichah sett en gnecht roola ivvah en evvahshtah.

¹¹En mann sei veisheit gebt eem geduld; 'sis zu sei eah vann eah's fa'achta dutt vann eah faletzt vatt.

¹²En kaynich sei zann is vi's roahres funn en layb, avvah sei gnawt is vi da dau uf em graws.

¹³En unksheidah boo bringd sei daett zu nix, un en zannichi fraw is vi vassah di gans zeit am drobsa.

¹⁴Heisah un reichheit vadda geahbt funn di eldra, avvah en goodi fraw kumd fumm HAH.

¹⁵Faulheit bringd deefah shlohf, un leit es nett shaffa gayn hungahrich.

¹⁶Sellah es es gebott hald, hald sei sayl; avvah sellah es sei vayk nett vatsht, kumd um.

¹⁷Sellah es bamhatzich is zu di oahma, is am layna zumm HAH, un eah zayld een zrikk betzawla fa vass eah gedu hott.

¹⁸Mach dei boo heicha diveil es hofning datt is, sei nett en hilf zu seim doht.

¹⁹En mann es kshvind bays vatt muss betzawla difoah, vann du eem aus druvvel helfsht, musht's yusht viddah du.

²⁰Heich ab zu goodah roht un nemm di lanning oh, so es du veisheit griksht fa shpaydah naus.

²¹En mann hott feel sacha im sinn fa du, avvah da HAH zayld's ausrichta vi eah's vill.

²²Vass leeblich is in en mensh is bamhatzichkeit; 'sis bessah fa oahm sei es vi en leeyah sei.

²³Di furcht fumm HAH fiaht zumm layva, no kann ebbah roowa un is frei funn druvvel.

²⁴En faulah mann dutt sei hand in di shissel, avvah eah bringd even's ess-sach nett ruff an sei maul.

²⁵Gebb en shpoddah shlayk, no vadda selli shmeaht es nett kshvind fashtayn; setz en mann recht mitt goodah fashtand, un eah grikt eisicht.

²⁶Sellah es sei daett veesht yoost, un sei maemm fatt yawkt, is en shandlich un unfashtendich kind.

²⁷Heah uf abheicha zu famohning, mei sohn, un du lawfsht vekk funn di vadda funn lanning.

²⁸En shlechtah zeiyah macht shpott funn anri iahra recht, un's maul funn di ungettlicha gleicht evil.

²⁹Leit es shpoddah sinn zayla kshtrohft vadda, un di bikkel funn di unksheida zayla gegaysheld vadda.