Read Pennsylvania German Shpricha 2 Bible Online

Shpricha 2 - Pennsylvania German bible

Shpricha 2

¹Mei kind, vann du mei vadda ohnemsht, un mei gebodda uf shtoahsht in diah,

²so es dei oah acht hott zu veisheit, un dei hatz gedrayt is fa sacha fashtay,

³un vann du naus roofsht fa eisicht, un dei shtimm rooft fa sacha begreifa,

⁴un vann du sell suchsht es vi fa silvah, un guksht difoah es vi fa keshtlich fashtekkeld sach,

⁵no zaylsht du di furcht fumm HAH fashtay, un zaylsht di vissaheit funn Gott finna.

⁶Fa da HAH gebt veisheit; funn seim maul kumd eisicht un gawb fa sacha fashtay.

⁷Eah shtoaht veisheit uf fa selli es ufrichtich sinn, un is en shield fa selli es lawfa in unshuld,

⁸fa eah heet di pawt funn selli es anri recht yoosa, un hald frei da vayk funn sei saylichi.

⁹No zaylsht du gerechtichkeit fashtay, un aw sell vass recht is, du zaylsht vissa vass feah un recht is in alli vayk.

¹⁰Fa veisheit zayld in dei hatz kumma, un eisicht zayld blesiahlich sei zu dei sayl.

¹¹Goodah fashtand zayld dich heeda, un eisicht zayld ivvah dich vatsha,

¹²un dich vekk halda fumm evila vayk, un funn mennah es ungettlich shvetza,

¹³funn selli es grawdi pawda falossa, un lawfa uf dunkli vayya,

¹⁴selli es blesiah henn in evil du, un sich gleicha ufhalda mitt seishi letzi sacha.

¹⁵Iahra pawda sinn grumm, un iahra vayya sinn nett grawt.

¹⁶Dess hald dich vekk funn di fremd fraw, funn di aybrechich fraw mitt iahra glatt kshvetz,

¹⁷selli es iahra mann falossa hott es see yung keiyaht hott, un fagest's bund es see gmacht hott fannich Gott.

¹⁸Iahra haus fiaht nunnah zumm doht, un iahra pawda zu di geishta funn di dohda.

¹⁹Kenni es zu iahra gayn kumma viddah zrikk, adda drayya zrikk zumm vayk funn layva.

²⁰So musht du da vayk lawfa funn goodi mennah, un dich uf di pawda funn di gerechta halda.

²¹Fa di ufrichticha zayla im land layva, un di unshuldicha zayla drinn bleiva.

²²Avvah di gottlohsa zayla abkshnidda sei fumm land, un di unshtandhafticha zayla raus gezowwa sei bei di vatzla.