Read Pennsylvania German Shpricha 20 Bible Online

Shpricha 20 - Pennsylvania German bible

Shpricha 20

¹Vei is en shpoddah, un shteik drinkes macht em vild, veah-evvah es fafiaht vatt dibei is nett shmeaht.

²Da zann funn en kaynich is vi en layb am roahra, veah een fazand dutt sei layva in di kfoah.

³'Sis en eah zu en mann es sich vekk hald funn shtreit, avvah ennich ebbah dummes kann en fecht shteahra.

⁴Da faul mann dutt nett bloowa im shpoht-yoah, so hott eah nix un muss bedla an di eahn.

⁵Vass en mann im sinn hott fa du, is vi ebbes in deef vassah, avvah en fashtendichah mann kann's raus zeeya.

⁶Feel leit sawwa vi shtandhaftich es si sinn, avvah's is hatt fa ebbah finna es gedraut sei kann.

⁷Da gerecht mann fiaht en unshuldich layva, un ksaykend sinn sei kinnah noch eem.

⁸Da kaynich es uf em kaynich-shtool hokt fa richta, sift raus awl's evil mitt sei awwa.

⁹Veah kann sawwa, “Ich habb mei hatz sauvah gmacht, un ich binn rein funn mei sinda?”

¹⁰Dess sinn zvay sacha es da HAH hast, uneahlichi gvichtah fa veeya, un uneahlichi ksharra fa messa.

¹¹Even en kind veist vass es is bei vass es dutt, bei gukka kann ma sayna eb's eahlich un goot is.

¹²Miah henn awwa fa sayna un oahra fa heahra, un da HAH hott si awl zvay gmacht.

¹³Leeb da shlohf nett, so es du nett oahm vasht; hald dei awwa vakkah so es du genunk broht hosht.

¹⁴“'Sis nix veaht, 'sis nix veaht,” sawkt da kawfah, avvah no gayt eah un braekt veyyich vass eah gekawft hott.

¹⁵'S hott feel gold un's hott feel keshtlichi shtay, avvah leftz es shvetza mitt eisicht sinn may keshtlich.

¹⁶Vann ebbah fashprocha hott fa goot shtay fa en fremdah sei shuld, dann nemm sei glayt un hald's biss di shuld betzawld is.

¹⁷Broht es uneahlich grikt vatt, is sees zu en mann, avvah eah end uf mitt en maul foll graevvel.

¹⁸Mach aus vass du du vitt bei goodah roht greeya; eb du greek machsht, frohk anri diveyya.

¹⁹Ebbah es kshvetzah drawkt, kann nix hinna rumm halda, so bleib vekk funn ebbah es zu feel shvetzt.

²⁰Vann ebbah sei maemm adda sei daett faflucht, sei licht vatt ausgedu im shvatz dunkla.

²¹En eahbshaft es kshvind grikt voah am ohfang, zayld nett ksaykend sei am end.

²²Sawk nett, “Ich zayl evil zrikk betzawla.” Voaht uf da HAH, un eah zayld diah helfa.

²³Da HAH hast unnahshidlichi gvichtah fa veeya, un en falshi vohk is nett goot.

²⁴En mann sei shritt sinn kfiaht beim HAH, vi kann en mann sei ayknah vayk vissa?

²⁵'Sis en fall fa zu kshvind en opfah fashprecha zu Gott, un no shpaydah eahsht drivvah denka.

²⁶En kaynich mitt veisheit sift di ungettlicha raus, un eah dreibt's dresha-rawt ivvah si.

²⁷Da geisht fumm mensh is es licht funn Gott, un dess licht sucht alles aus im innahlicha mensh.

²⁸Di voahheit un shtandhaftichkeit heeda da kaynich, un gerechtichkeit hald een uf seim kaynich-shtool.

²⁹Di hallichkeit funn yungi leit is iahra grefta, un di eah funn aldi leit is iahra veis-grohwi hoah.

³⁰Haddah shtrohf butzt evil vekk, un eahnshtlichi shtraych macht's innahlicha sauvah.