Read Pennsylvania German Shpricha 21 Bible Online

Shpricha 21 - Pennsylvania German bible

Shpricha 21

¹Em kaynich sei hatz is in di hand fumm HAH; vi vassah am lawfa, so fiaht eah eem sei hatz anna vo eah vill.

²Alli mann sei vayk is recht in sei aykni awwa, avvah da HAH gukt uf's hatz.

³Fa du vass recht un feah is, is may leeblich zumm HAH es opfahra.

⁴Hohch-oahrichi awwa un en shtols hatz— di lichtah funn di gottlohsa—sinn sinda.

⁵Vass di fleisicha im sinn henn fa du, macht si may es genunk havva, avvah ebbah es sacha zu kshvind dutt, kumd in di noht.

⁶Reich vadda bei leeya sawwa zayld nett lang laesta, un is en fall es zumm doht fiaht.

⁷Es rawves funn di gottlohsa zayld si vekk shlayfa, veil si's nett doon fa recht du.

⁸Da vayk funn di shuldicha is grumm, avvah di unshuldicha doon vass recht is.

⁹'Sis bessah fa in en ekk voona drovva uf em dach, es vi im haus voona mitt en zannichi fraw.

¹⁰Di sayl fumm gottlohsa is ufgnumma mitt evil, un eah hott kenn bamhatzichkeit fa sei nochbah.

¹¹Vann en shpoddah kshtrohft vatt, dann lanna even di dumma veisheit; vann ebbah mitt veisheit gland vatt, dann grikt eah eisicht.

¹²Sellah Gerecht nemd acht vass am ohgay is im haus funn di gottlohsa, un eah bringd di gottlohsa nunnah zu nix.

¹³Veah sei oahra zu shtobt zumm roofes funn di oahma, zayld selvaht aw naus roofa un nett keaht sei.

¹⁴En kshenk es hinna rumm gevva is, drayt da zann; un en betzawling fashtekkeld kalda, drayt even grohsah zann.

¹⁵Di gerechta sinn froh vann ebbes feah ausgedrawwa is, avvah's bring furcht zu di evil-shaffah.

¹⁶Ennich ebbah es vekk lawft funn goodah fashtand, zayld uf enda in di fasamling funn di dohda.

¹⁷Sellah es blesiah gleicht zayld oahm vadda; sellah es vei un ayl gleicht zayld nett reich vadda.

¹⁸Di gottlohsa missa en betzawling sei fa di gerechta, un di unshtandhafticha fa di ufrichticha.

¹⁹'Sis bessah fa draus in di vildahnis voona, es es is fa mitt en faglawkti un en zannichi fraw voona.

²⁰Keshtlich sach un ayl is in di haymeda funn selli mitt veisheit, avvah dummi leit essa's alles uf.

²¹Selli es gerechtichkeit un bamhatzichkeit nohch gayn, zayla layva, gerechtichkeit un eah finna.

²²En mann mitt veisheit kann ivvah di shtatt-mavvah funn di mechticha gradla, un kann iahra shteikah blatz nunnah reisa es si sich falossa druff.

²³Veah sei maul un zung vatsht, hald sich aus druvvel.

²⁴“Shpoddah” is da nohma fumm shtolsa un grohs-feelicha mann; eah lawft in frechi shtolsheit.

²⁵En faulah mensh sei falanga macht een doht, veil eah's nett dutt fa shaffa.

²⁶Da gans dawk lang dayt eah gleicha may havva, avvah da gerecht gebt un haybt nix zrikk.

²⁷Da opfah fumm gottlohsa is grausam, un vi feel may vann eah's bringd mitt evili gedanka.

²⁸En falshah zeiyah zayld umkumma, avvah veah goot abheicht, sei zeiknis bleibt ayvichlich.

²⁹Da gottlohs mann lost oh mitt seim kobb in di hay, avvah da ufrichtich mann denkt an vass eah dutt.

³⁰'Sis kenn veisheit, kenn eisicht un kenn roht, es ufshtay kann geyyich da HAH.

³¹Da gaul is grisht fa fechta im greek, avvah sayf bleiva heaht zumm HAH.