Read Pennsylvania German Shpricha 22 Bible Online

Shpricha 22 - Pennsylvania German bible

Shpricha 22

¹En goodah nohma is may veaht es feel reichheit, un goodi eah is bessah es silvah un gold.

²Di reicha un di oahma sinn gleicha in ay ding; da HAH hott si awl gmacht.

³En mann es denkt, saynd di kfoah un fashtekkeld sich, avvah di dumma gayn on un missa leida difoah.

⁴Daymoot un di furcht fumm HAH, bringa reichheit, eah un layva.

⁵In di pawt funn di gottlohsa sinn danna un fang-shtrikka, avvah sellah es sich vatsht hald sich veit vekk funn eena.

⁶Lann en kind vi eah gay soll, un vann eah moll ald vatt drayt eah nett vekk difunn.

⁷Di reicha roola ivvah di oahma, un sellah es laynd is en gnecht zu sellah es eah glaynd hott difunn.

⁸Veah unrecht sayt, eahnd druvvel, no kumd di root funn seim zann zu en end.

⁹En mann es geahn gebt zayld ksaykend vadda, fa eah gebt funn seim broht zu di oahma.

¹⁰Dreib da shpoddah naus, un shtreit gayt aw naus, no vatt's zarres un veeshti kshvetzah aw kshtobt.

¹¹Veah en rein hatz leebt un gnaydich shvetzt, zayld em kaynich sei freind sei.

¹²Di awwa fumm HAH vatsha ivvah eisicht, avvah di vadda funn di unshtandhafticha vadda ivvah-kshmissa.

¹³En faulah mensh sawkt, “'Sis en layb draus; ich mecht doht gmacht vadda in di shtrohsa.”

¹⁴Es maul funn en huah is vi en deef loch, sellah es Gott zannich is mitt fald datt nei.

¹⁵Dumheida sinn im hatz funn kinnah, avvah da shlayk-shtekka dreibt's aus eena.

¹⁶Sellah es di oahma nunnah drett fa sich selvaht reich macha, adda sellah es kshenkah gebt zu di reicha—si vadda awl zvay oahm.

¹⁷Heich ab, un ich lann dich di vadda funn selli mitt veisheit; nemm zu hatz vass ich dich lann.

¹⁸Fa's zayld leeblich sei vann du dee vadda im sinn haldsht, un si awl grisht haldsht uf dei leftz.

¹⁹Ich lann dich dee vadda heit, so es du dei hofning in da HAH dusht.

²⁰Habb ich nett feel goodi sacha kshrivva fa dich es roht un lanning gevva?

²¹Habb ich nett dee kshrivva fa veisa vass recht un voah is, so es du en voah andvat gevva kansht zu selli es dich kshikt henn?

²²Rawb di oahma nett veil si oahm sinn, un drett selli nett nunnah am richts-doah es in noht sinn;

²³fa da HAH zayld ufshtay fa si, un nemd's goot layva vekk funn selli es iahra recht vekk nemma.

²⁴Mach dich nett en freind mitt en zannichah mann, hald dich nett uf mitt aynah es kshvind bays vatt,

²⁵adda du mechsht sei vayya lanna un dei aykni sayl in en fall greeya.

²⁶Sei nett ayns funn selli es en bund macha, un fashprech nett fa goot shtay fa ebbah sei shulda;

²⁷vann du nix hosht fa's betzawla, dann vatt dei ayya bett unnich diah vekk gnumma.

²⁸Moof nett da ald meik-shtay es di foah-feddah datt anna ksetzt henn.

²⁹Saynsht du en kshiktah mann am sei eahvet du? Eah zayld fannich kaynicha shtay; eah zayld nett fannich niddahri leit shtay.