Read Pennsylvania German Shpricha 23 Bible Online

Shpricha 23 - Pennsylvania German bible

Shpricha 23

¹Vann du dich anna hoksht fa essa amma roolah sei dish, gebb goot acht vass fannich diah is,

²un du en messah an dei hals, vann du aebt bisht fa zu feel essa.

³Sei nett greedich fa sei fei ess-sach, fa es mecht falsh ess-sach sei.

⁴Veah dich nett aus am broviahra reich vadda, sei shmeaht genunk fa dich zrikk hayva.

⁵Vann du dei awwa uf reichheit setsht, uf aymol is es fatt, fa's grikt geviss flikkel, un fleekt noch em himmel vi en awdlah.

⁶Ess nett's ess-sach funn en geitzichah mann, sei nett greedich fa sei fei ess-sach;

⁷fa eah is en mann es immah am denka is veyyich vi feel es es kosht. Eah sawkt, “Drink un ess,” avvah sei hatz is nett mitt diah.

⁸Vass bissel es du gessa hosht zaylsht du ruff shmeisa, un dei freindlichi vadda zayla faloahra gay.

⁹Broviah nett fa fashtand shvetza zu en unksheidah mensh, fa eah fa'acht di veisheit in dei vadda.

¹⁰Du nett da ald meik-shtay moofa, un gay nett in di feldah funn kinnah unni eldra,

¹¹fa da HAH, es iahra Beishtand is, is shteik; eah shtayt uf fa si geyyich dich.

¹²Nemm zu deim hatz vass ich dich lann, un zu dei oahra di vadda funn eisicht.

¹³Heah nett uf dei kind macha sich behayfa, eah zayld nett shteahva vann du een shlaksht mitt en shtekka.

¹⁴Shtrohf een mitt en shtekka, un du haldsht sei sayl fumm doht.

¹⁵Mei sohn, vann dei hatz veisheit hott, dann is mei hatz aw froh.

¹⁶Mei innahlichi sayl is froh, vann dei leftz shvetza vass recht is.

¹⁷Sei nett fagunnish veyyich sindah, avvah layb immah im furcht fumm HAH.

¹⁸'Sis gevislich en goodi hofning fa dich, un dei hofning zayld nett abkshnidda sei.

¹⁹Heich moll, mei sohn, un grikk veisheit, un hald dei hatz uf di recht pawt.

²⁰Sei nett mitt selli es zu feel drinka, adda zu feel flaysh fressa,

²¹fa siffah un fressah zayla oahm vadda, un shlayfahrich sei macht si farissani glaydah veahra.

²²Heich dei daett ab, deah es diah layva gevva hott, un fa'acht dei maemm nett vann see moll ald vatt.

²³Kawf di voahheit un du see nett fakawfa, grikk veisheit, lanning un eisicht.

²⁴Da faddah funn en gerechtah mann froit sich; ebbah es en boo hott mitt veisheit, is fraylich ivvah een.

²⁵Loss dei daett un maemm froh sei, loss see es dich geboahra hott sich froiya.

²⁶Mei sohn, gebb miah dei hatz, un loss dei awwa sich froiya fa mei vayk halda,

²⁷fa di huah is en deef loch, un en aybrechichi fraw is vi en engah brunna,

²⁸see leit am voahra vi en rawvah, un macht feel mansleit nett eahlich sei zu iahra veivah.

²⁹Veah hott druvvel? Veah hott dreebsawl? Veah hott shtreit? Veah hott en glawk? Veah hott en vayyah blakka unni uahsach? Veah hott dreebi awwa?

³⁰Selli es lang beim vei hokka, selli es rumm heah gayn am gukka fa iahra vei mixa.

³¹Loss dich nett fasucht vadda bei da vei ohgukka, vi eah so roht un glitzahrich datt im glaws shtayt, un gayt so glatt da hals nunnah.

³²Im end beist eah vi en shlang; vi en giftichi shlang beist eah.

³³Dei awwa zayla kshpassichi sacha sayna, un dei meind zayld fashtatzt sei.

³⁴Du zaylsht sei vi ebbah am shlohfa draus uf em say, vi ebbah am zrikk un faddi shvinga drovva uf em shiff sei maest.

³⁵“Si henn mich kshlauwa,” zaylsht du sawwa, “avvah's dutt mich nett vay; si henn mich geglobt, avvah ich feel's nett. Vann zayl ich ufvekka so es ich noch en drink havva kann?”