Read Pennsylvania German Shpricha 24 Bible Online

Shpricha 24 - Pennsylvania German bible

Shpricha 24

¹Fagunn gottlohsi mennah nett, un vinsh nett fa bei eena sei;

²fa si henn yusht unfashtand im sinn, un iahra leftz shvetza yusht veyyich druvvel macha.

³Deich veisheit is en haus gebaut, un deich goodah fashtand is es shteik gmacht;

⁴deich eisicht vadda di shtubba kfild mitt keshtlichi un shayni sacha.

⁵En mann mitt veisheit is oahrich shteik, un en mann mitt eisicht vatt mechtichah mitt graft.

⁶Fa greek macha muss ma goodah roht havva, un fa ivvah-kumma im greek brauch ma feel roht-gevvah.

⁷Veisheit is zu deef fa en unksheidah mann, eah macht sei maul nett uf in di fasamling am doah.

⁸Veah evil im sinn hott, zayld en druvvel-machah kaysa sei.

⁹Ausmacha fa dumhayda dreiva is en sind, un leit hassa ebbah es shpodda dutt.

¹⁰Vann du uf gebsht an di zeit funn druvvel, dann bisht du adlich shvach.

¹¹Setz selli frei es am vekk gnumma vadda sinn zumm doht; hayb selli zrikk es am zumm shlawdah shtolbahra sinn.

¹²Du mechsht sawwa, “Gukk moll, miah henn nix gvist veyyich demm,” avvah dutt nett sellah es es hatz veekt sell vissa? Dutt nett sellah es vatsht ivvah dei sayl dess vissa? Dutt eah nett alli mann zrikk betzawla fa vass eah dutt?

¹³Ess hunnich, mei kind, fa hunnich is goot, hunnich is sees zu dei zung.

¹⁴Grawt so is di veisheit goot fa dei sayl; vann du see finsht dann zayld's goot gay fa dich, un dei hofning vatt nett abkshnidda.

¹⁵Lei nett anna am voahra vi en gottlohsah mensh, fa in en gerechtah mann sei haus gay; gay nett nei fa een rawva;

¹⁶fa en gerechtah mann fald sivva mohl anna un shtayt viddah uf, avvah di gottlohsa vadda nunnah gebrocht deich druvvel.

¹⁷Sei nett froh vann dei feind fald, loss dei hatz sich nett froiya vann eah shtolbaht,

¹⁸adda da HAH mecht's sayna un nett froh sei mitt, un eah gayt un drayt sei zann vekk funn eem.

¹⁹Bekimmah dich nett veyyich dee vo evil doon, un sei nett jealous veyyich di gottlohsa,

²⁰fa da evil mann hott nix zu hoffa difoah, un's licht fumm gottlohsa vatt aus geblohsa.

²¹Du da HAH un da kaynich firchta, mei sohn, un hald dich nett uf mitt selli es eena nett heicha,

²²fa funn selli zvay kumd bletzlich fadauves, un veah vayst vass fa druvvel es si bringa kenna.

²³Dess sinn aw vadda funn selli mitt veisheit: Es is nett goot fa seits nemma am richta.

²⁴En richtah es zu di gottlohsa sawkt, “Du bisht unshuldich,” vatt faflucht bei di leit, un alli-ebbah hast een;

²⁵avvah mitt richtah es di shuldicha shtrohfa gayt's goot, un reichi sayya kumma uf si.

²⁶En eahlich andvat is vi en kuss uf di leftz.

²⁷Mach dei eahvet seahsht faddich draus, un grikk dei feldah grisht; noch sellem bau dei haus.

²⁸Du nett zeiya geyyich dei nochbah unni uahsach, un du nett fafiahra mitt dei leftz.

²⁹Sawk nett, “Ich zayl du zu eem vi eah gedu hott zu miah; ich zayl een zrikk betzawla fa vass eah gedu hott.”

³⁰Ich binn am feld fabei ganga fumm faulensah, un am vei-goahra fabei funn en dummah mann;

³¹un dee feldah voahra ufgvaxa mitt danna, da grund voah gedekt mitt veetz, un di shtay vand voah nunnah kfalla.

³²Vo ich dess ksenna habb, habb ich drivvah gedenkt, un ich habb ebbes gland funn vass ich ksenna habb.

³³Noch en vennich shlohfa, noch en vennich leiya bleiva, noch en vennich di hend zammah du fa roowa—

³⁴no kumd di oahmoot uf dich vi en rawvah, un du hosht nix, grawt es vi vann du grawbt gvest veahsht.