Read Pennsylvania German Shpricha 25 Bible Online

Shpricha 25 - Pennsylvania German bible

Shpricha 25

¹Dess sinn aw di shpricha fumm Solomon es nunnah kshrivva voahra bei di mennah fumm Hiskia, da kaynich funn Juda.

²Es is Gottes eah fa sacha zu gedekt halda, avvah's is kaynich-eah fa sacha aussucha.

³Vi di himla hohch sinn, un di eaht deef is, so is es hatz funn kaynicha, veah kann's fashtay?

⁴Nemm da shaum ab funn kshmolsa silvah, no kann's gyoost sei beim silvah-shmitt.

⁵Nemm di gottlohsa vekk fumm kaynich, un sei kaynich-reich kann fesht gmacht sei in gerechtichkeit.

⁶Du dich nett hohch uf hayva fannich em kaynich, un shtell dich nett in da blatz funn grohsi mennah;

⁷fa's is bessah fa ksawt sei, “Kumm do ruff,” es vi niddahra nunnah gedu sei fannich en roolah. Sell es du ksenna hosht mitt dei awwa,

⁸nemm's nett kshvind in di court, fa vass zaylsht du du am end vann dei nochbah veist es du letz bisht?

⁹Mach dei sacha recht mitt deim nochbah, avvah drawk kenn kshvetz veyyich anri;

¹⁰adda sellah es es heaht mecht diah en shlechtah nohma gevva, un du kansht dei goodah nohma nee nimmi zrikk greeya.

¹¹En vatt es ksawt is an di recht zeit, is vi goldichi ebbel es in silvah ksetzt sinn.

¹²En zank gevva zu en oah es heaht bei ebbah mitt veisheit, is vi en goldichah oahra-ring adda en goldich hals-band.

¹³Vi di keld funn shnay an di zeit funn di eahn, so is en shtandhaftichah gebodda-drawwah zu selli es een shikka; eah fashteikt di sayl funn sei meishtahra.

¹⁴Vi volka un vind unni reyya, so is en mann es braekt veyyich kshenkah es eah nett gevva hott.

¹⁵Deich geduld kann en roolah fashvetzt sei, un en leichti zung kann en gnocha fabrecha.

¹⁶Vann du hunnich findsht, ess nett zu feel, zu feel macht dich ruff shmeisa.

¹⁷Gay nett zu oft in dei nochbah sei haus, eah mecht dich laydich vadda un ohfanga dich hassa.

¹⁸En mann es falshi zeiya drawkt veyyich sei nochbah, is vi en shpiah, en shvatt adda en shaufah arrow.

¹⁹Em falossa uf en unshtandhaftichah mann an di zeit funn druvvel, is vi en shlechtah zoh adda en lohmah foos.

²⁰Ebbah es leedah singd zu en gedruvveld hatz, is vi aynah es ebbah sei glaydah vekk nemd uf en kaldah dawk, adda vi essich uf soda leahra.

²¹Vann dei feind hungahrich is, gebb eem broht zu essa; vann eah dashtich is, gebb eem vassah zu drinka.

²²Vann du dess dusht bisht am feiyahrichi kohla uf sei kobb du, un da HAH zayld dich zrikk betzawla.

²³Da natt vind bringd reyyah, un shlechti kshvetzah bringa baysi ksichtah.

²⁴'Sis bessah fa in en ekk voona drovva uf em dach, es vi in en haus voona mitt en zannichi fraw.

²⁵Vi kald vassah zu en dashtichi sayl, so sinn goodi gebodda funn en veit ab land.

²⁶En gerechtah mann es eigebt zu di gottlohsa, is vi en moddichi shpring adda en drekkichah brunna.

²⁷Es is nett goot fa zu feel hunnich essa, un's is nett goot fa gay gukka fa hohchi eah.

²⁸En mann es sei zann nett zrikk hayva kann, is vi en uffeni shtatt unni mavvahra.