Read Pennsylvania German Shpricha 26 Bible Online

Shpricha 26 - Pennsylvania German bible

Shpricha 26

¹Vi shnay im summah, un reyyah in di eahn, so is hohchi eah nett shiklich fa en unksheidah mensh.

²Shpatza un shvalma es rumm fleeya unni runnah kumma, sinn vi en unshuldichah fluch; eah kumd nett runnah uf ebbah.

³En fitz fa da gaul, en zohm fa da aysel, un en shtekka fa da bukkel funn di unksheida.

⁴Gebb em unksheida kenn ksheit andvat, adda du mechsht vadda vi eah is.

⁵Gebb em unksheida yusht unksheit andvat, adda in sei aykni awwa maynd eah eah veah shmeaht.

⁶Veah en gebott shikt bei di hand funn en unksheidah, is vi ebbah es sei aykni fees abshneit, adda sich shawda dutt.

⁷En shpruch im maul fumm unksheida, is vi en gribbel sei bay es lummahrich henka.

⁸Fa hohchi eah gevva zu en unksheidah mensh, is vi broviahra en shtay shmeisa vann eah in di shling gebunna is.

⁹Vi en dann in di hand funn en ksoffanah, so is en shpruch im maul fumm unksheida.

¹⁰Vi en bow-hundah es ennich ebbes ohsheest es eah saynd, so is ebbah es en unksheidah dingd fa shaffa, adda yusht ennich ebbah es fabei gayt.

¹¹Vi en hund es viddah frest vass eah ruff kshmissa hott, so is da unksheit es sei dumhayda viddah dutt.

¹²Saynsht du en mann es in sei aykni awwa maynd eah veah shmeaht? 'Sis graysahri hofning fa en unksheidah es fa een.

¹³Da faul mann sawkt, “'Sis en layb draus uf em vayk! 'Sis en layb uf di shtrohsa!”

¹⁴Vi en deah zrikk un faddi drayt uf di hinges, so dutt en faulah mann in seim bett.

¹⁵En faulah mann dutt sei hand in di shissel, avvah's veaht een aus fa's ess-sach ruff an sei maul bringa.

¹⁶En faulah mann maynd eah hott may veisheit, es sivva mennah es en ksheit andvat gevva.

¹⁷Veah fabei gayt un sich ufmixt in anri iahra shtreit, is vi ebbah es en baysah hund graebt bei di oahra.

¹⁸Vi en vildah mann es feiyahrichi arrows sheest fa doht macha,

¹⁹so is da mann es sei nochbah fafiaht, un sawkt, “Ich habb's yusht gedu in kshpass!”

²⁰Unni hols gayt's feiyah aus, un unni kshvetzah, shtobt da shtreit.

²¹Vi di kohla zu di hays gloot, un vi hols zumm feiyah, so is en druvvel-machah am shtreit ufshtadda.

²²Di vadda funn kshvetz-drawwah sinn vi sees ess-sach, si vadda glatt eikshlukt nunnah in da bauch.

²³Gladdi leftz un en evil hatz, sinn vi eahdich ksha es ivvah-gedekt is mitt silvahrichah shaum.

²⁴Ebbah es hast, fashteld's mitt sei lefts, avvah im hatz is eah falsh.

²⁵Vann eah glatt shvetzt, glawb eem's nett, fa's sinn sivva veeshti gedanka in seim hatz.

²⁶Eah hald sei hass zu gedekt fa shawda du, avvah sei ungettlichkeit vatt raus gebrocht fannich di leit.

²⁷Vann en mann en loch grawbt, dann fald eah selvaht nei; vann en mann en shtay rold, dann rold eah zrikk uf een.

²⁸En falshi zung hast selli leit es see vay dutt, un gladdi leftz bringa yusht fadeahves.