Read Pennsylvania German Shpricha 27 Bible Online

Shpricha 27 - Pennsylvania German bible

Shpricha 27

¹Braekk nett veyyich vass du du zaylsht meiya, fa du vaysht nett vass en dawk foah bringd.

²Loss en anrah dich preisa, un nett dei ayya maul; loss es en fremdah sei, un nett dei aykni leftz.

³En shtay is shveah, un sand hott gvicht, avvah da druvvel es en unksheidah macht is shveahrah es si awl zvay.

⁴Zann is veesht, un bays vadda nemd ebbah ivvah, avvah veah kann ufshtay zu fagunsht?

⁵Uffenah shtrohf is bessah es vi fashtekkeldi leevi.

⁶Du kansht en freind drauwa es dich recht setzt, avvah da kuss funn en feind fafiaht.

⁷En mann es satt is drayt hunnich nunnah, avvah zu en mann es hungahrich is, is even biddah sach sees.

⁸Vi en fokkel es faloahra vekk fleekt funn sei nesht, is en mann es vekk lawft funn sei haus.

⁹Goot-shmakkich ayl un insens macht's hatz froh, un en mann sei roht is sees zu sei freind.

¹⁰Faloss dei freind adda dei faddah sei freind nett, un gay nett zu deim broodah sei haus uf em dawk funn druvvel. 'Sis bessah fa zu deim naykshtah nochbah gay, es vi zu deim broodah es veit ab is.

¹¹Grikk veisheit, mei sohn, un bring frayt zu meim hatz, no habb ich en goot andvat zu selli es geyyich mich shvetza.

¹²En mann es denkt, saynd di kfoah un fashtekkeld sich, avvah di dumma gayn on un missa leida difoah.

¹³Vann ebbah fashprocha hott fa goot shtay fa en fremdah sei shuld, dann nemm sei glayt un hald's biss di shuld betzawld is.

¹⁴Vann ebbah sei nochbah laut saykend free meiyets, dann vatt's gnumma fa en fluch.

¹⁵En zannichi fraw is vi vassah am ohhalda drobsa uf en reyyahrichah dawk;

¹⁶fa see shtobba is vi broviahra da vind shtobba, adda fa broviahra ayl hayva in dei rechtsi hand.

¹⁷Eisa is shauf gmacht mitt eisa, so dutt ay mann en anrah mann shauf macha.

¹⁸Veah-evvah es acht gebt uf en feiya-bohm zayld sei frucht essa, un veah-evvah es acht gebt uf sei meishtah vatt hohch-geaht.

¹⁹Vi du dei ksicht sayna kansht in vassah, so kansht du dich selvaht sayna in deim hatz.

²⁰Da doht un's grawb vella immah noch may einemma, un so vella di awwa fumm mensh.

²¹Vi gold un silvah broviaht is bei feiyah, so is en mann ausbroviaht vann eah gepreist vatt.

²²Even vann du en unksheidah fashtambsht mitt en shtambah funn em famawld frucht, doch kansht du sei dumhayda nett aus eem nemma.

²³Gebb goot acht uf dei shohf, un gukk noch deim fee;

²⁴fa reichheit bleibt nett fa'immah un en krohn vatt nett zu di nohch-kummashafta gevva fa'immah.

²⁵Vann's graws abgmacht is fa hoi, un's nei graws kumd uf, un vann's hoi funn di hivla rei gebrocht is,

²⁶dann gevva di lemmah diah glaydah, un di gays diah genunk fa en feld kawfa.

²⁷Du zaylsht genunk gaysa millich havva fa dei family feedra, un aw fa dei mawda feedra.