Read Pennsylvania German Shpricha 28 Bible Online

Shpricha 28 - Pennsylvania German bible

Shpricha 28

¹Di gottlohsa shpringa fatt even vann nimmand eena nohch is, avvah di gerechta sinn so shuah funn sich selvaht es en layb.

²Vann en land sindicht, hott's feel roolahs, avvah vann's groold is bei en mann mitt goodah fashtand un eisicht, dann shtayt's lang.

³En oahmah mann es di oahma nunnah drett, is vi en shteikah reyya es kenn ess-sach ivvahrich lost im goahra.

⁴Selli es es ksetz falossa, lohva di gottlohsa, avvah selli es es ksetz halda, shaffa geyyich si.

⁵Leit es evil doon, fashtayn nett vass feah is, avvah selli es zumm HAH gukka, fashtayn's goot.

⁶'Sis bessah fa en oahmah mann sei es eahlich lawft, es vi en reichah mann sei es uneahlich lawft.

⁷En boo es es ksetz hald hott veisheit, avvah aynah es sich uf hald mitt fressah shohmd sei daett.

⁸Vann ebbah reich vatt bei zu feel indressa tsheahtsha, sellah geddaht's fa ebbah shunsht es bamhatzich is zu di oahma.

⁹Ebbah es sei oah vekk drayt funn's ksetz heahra, macht even sei gebaydah grausam.

¹⁰Ebbah es di ufrichticha in en evilah vayk fiaht, zayld in sei aykni fall falla, avvah di unshuldicha zayla en goodi eahbshaft greeya.

¹¹En reichah mann maynd eah veah shmeaht in sei aykni awwa, avvah en oahmah mann mitt eisicht kann deich een sayna.

¹²Vann di gerechta ivvah-hand henn, dann hott's grohsi hallichkeit, avvah vann di gottlohsa in di macht kumma, dann doon leit sich fashtekla.

¹³Veah sei sinda fashtekkeld hald, zayld nett goot du, veah si avvah bekend un falost, find bamhatzichkeit.

¹⁴Ksaykend is da mann es da HAH immah firchta dutt, avvah sellah es sei hatz hatt macht kumd in druvvel.

¹⁵En gottlohsah roolah ivvah oahmi leit, is vi en roahrichah layb un en hungahrichah beah.

¹⁶En roolah es kenn fashtand hott, drett leit nunnah, avvah aynah es uneahlich geld hast, zayld lang layva.

¹⁷Ebbah es mensha-bloot shuldich is, zayld sich fashtekkeld halda biss an's grawb; loss nimmand eem helfa.

¹⁸Veah unshuldich lawft bleibt aus di kfoah, avvah veah uneahlich is zayld bletzlich in en loch falla.

¹⁹Veah-evvah es sei land shaft, zayld feel broht havva, avvah veah unaydichi sacha nohch gayt, zayld oahrich oahm sei.

²⁰En shtandhaftichah mann zayld feel sayya havva, avvah aynah es kshvind reich vadda vill, zayld nett unkshtrohft gay.

²¹Es is nett goot es en richtah unnahshitt macht fa ebbah, avvah dayl doon letz fa en shtikk broht.

²²En geitzichah mann is eahnshtlich fa reich vadda, un vayst nett es eah glei oahm sei zayld.

²³Ebbah es en mann grawt raus zankt, grikt shpaydah may dank, es vi ebbah es en mann ohshmaycheld mitt di zung.

²⁴Ebbah es sei maemm un daett rawbt, un sawkt, “Sell is nett letz,” is en freind zu selli es sacha fadauva.

²⁵En greedichah mensh shtatt shtreit uf, avvah veah sich uf da HAH falost zayld goot ab sei.

²⁶Ebbah es sich falost uf sich selvaht is dumm, avvah ebbah es lawft in veisheit bleibt aus di kfoah.

²⁷Ebbah es gebt zu di oahma zayld kenn noht havva, avvah veah sei awwa zu macht zu eena vatt feel faflucht.

²⁸Vann di gottlohsa ivvah-hand henn, dann doon leit sich fashtekla, avvah vann di gottlohsa umkumma, vadda di gerechta feel.