Read Pennsylvania German Shpricha 3 Bible Online

Shpricha 3 - Pennsylvania German bible

Shpricha 3

¹Mei kind, fagess nett vass ich dich gland habb, un hald mei gebodda in deim hatz.

²Fa si zayla diah en lang layva, langi yoahra, un fridda bringa.

³Loss leevi un shtandhaftichkeit dich nett falossa, binn si um dei hals rumm, un shreib si uf's babiah funn deim hatz.

⁴No zaylsht du ohksenna sei un en goodah nohma havva, in di awwa funn Gott un mensha.

⁵Faloss dich uf da HAH mitt deim gans hatz, un faloss dich nett uf dei ayknah fashtand;

⁶denk an een in awl dei vayya, no zayld eah dich recht fiahra.

⁷Dink dich nett oh fa selvaht veisheit havva, feich dich fumm HAH, un dray vekk funn evil.

⁸Dess macht dei leib ksund, un macht dei gnocha shteik.

⁹Gebb em HAH eah bei eem gevva funn vass du hosht, un gebb eem's eahsht-frucht funn deim land.

¹⁰No vadda dei sheiyahra kfild mitt blendi, un dei fessah lawfa ivvah mitt neiyah vei.

¹¹Mei kind, dray's nett nunnah vann da HAH dich recht setzt, un sei nett zannich vann eah dich shtrohft fa letz du.

¹²Fa veah da HAH leeb hott, sellah dutt eah shtrohfa, grawt vi en faddah sei boo dutt vo eah frayt hott mitt.

¹³Ksaykend is da mann es veisheit find, un aw da mann es eisicht grikt.

¹⁴Veisheit is may veaht zu diah es silvah, un du griksht may raus difunn es funn gold.

¹⁵Veisheit is may veaht es deiyahri pearls, un nix es du havva vitt is so keshtlich.

¹⁶Lang layva is in di veisheit iahra rechtsi hand, un in iahra lingsi hand is reichheit un eah.

¹⁷Iahra vayya sinn leeblich, un in awl iahra pawda is fridda.

¹⁸Di veisheit is en layves-bohm zu selli es see ohnemma, un ksaykend sinn selli es zu iahra henka.

¹⁹Bei veisheit hott da HAH di eaht kshaffa, un bei sei eisicht hott eah di himla in iahra blatz gedu.

²⁰Bei sei eisicht hott eah di deefa vassahra fadayld, un hott di volka gmacht iahra dau falla lossa.

²¹Mei kind, hald veisheit un goodah fashtand, loss si nee nett vekk funn dei awwa kumma.

²²Si zayla layva sei fa dei sayl, un vi ebbes shaynes um dei hals rumm.

²³No zaylsht du dei vayk lawfa unni kfoah, un dei foos zayld nett shtolbahra.

²⁴Vann du dich anna layksht, brauchsht du dich nett feicha, yau, vann du dich anna layksht, zayld dei shlohf sees sei.

²⁵Feich dich nett veyyich unfahoft druvvel, adda veyyich's fadauves es uf di gottlohsa kumd,

²⁶fa da HAH is dei drohsht, un eah hald dei foos funn kfanga vadda.

²⁷Hald dich nett funn goot du zu selli es es veaht sinn, vann's in dei macht is fa's du.

²⁸Sawk nett zu deim nochbah, “Gay haym un kumm viddah zrikk meiya,” vann du's nau hosht fa gevva.

²⁹Mach nett aus fa letz du zu deim nochbah, deah es nayksht bei diah voond un dich draut.

³⁰Shvetz nett bays zu ennich ebbah unni uahsach, vann eah nix gedu hott zu diah.

³¹Sei nett jealous funn ennich ebbah es gvald yoost, un du nett vi eah dutt.

³²Da HAH hast ebbah es evil dutt, avvah eah is en freind zumm ufrichticha.

³³Em HAH sei fluch is uf di gottlohsa iahra haus, avvah sei sayya is uf di haymet funn di gerechta.

³⁴Eah fashpott selli es shpott macha, avvah eah gebt gnawt zu di daymeedicha.

³⁵Leit mitt veisheit eahva hohchi eah, avvah di unksheida vadda fashohmd.